اسلام آباد۔ 21 فروری (اے پی پی) مسکوہی سفیر ایاز وزیر پارینے کہ دہشت گردی نا چٹفنگ کن پاکستان و اوغانستان نا نیام اٹ تعلقداری تا گچینی بے کچ المی ئِ۔ ریڈیو پاکستان تون ہیت وگپ کرسا اوپارے کہ بھارت و اوغانستان نا نیام اٹ تعلقداریک مست آن جوان ئسر ولے نائن الیون آن پد بھارت اوغانستان اٹی کروک آ زرکاری آن فائدہ دوئی کننگ نا بنائِ کرے و پاکستان نا سیمی علاقہ غاتیٹی انتہاپسندی نا بنائِ کرے۔ اوپارے کہ دامسخت کن بھارت اوغانستان نا گل زمین و جماعت الاحرار ئِ کاریم اٹ اتنگ ئِ۔ ایاز وزیر پارے کہ پاکستان نا برانز آ اوغان حکومت نا پاننگ ئِ کہ او جماعت الاحرار ئِ سرمایہ تفننگ ئِ ، ہراتم اوغان حکومت شدت پسندآتے سرمایہ تفننگ ئِ تو دا ہیت صفا ئِ کہ ولدا سرمایہ بھارت ہی تننگ ئِ ۔ پاکستان اٹی دہشت گرد جلہو آتیا جہانی برادری نا خاموشی آ کروک آ سوج انا ورندی ئِ ترسا اوپارے کہ جہانی میڈیا ہند جلہو آتیا تینا تینا انداز اٹ خیال آتا درشانی ئِ کرینے ولے جہانی حکومت آتا خاموشی درست ئُ عمل اس اف۔ اوپارے کہ نائن الیون آن پد امریکہ پاکستان آن ”ڈومور“ نا خواست کرے ہراڑآنن قطبی وزیرستان اٹی پبی آپریشن کرین ولے داسہ ہراتم اوغانستان نا گل زمین آن پاکستان اٹی شدت پسندی مریک تو او اوغانستان اٹی ڈرون جلہو انت اکن کپک۔ اوپارے کہ داعمل کن روس، چین، پاکستان و اوغانستان باہم کڑد ادا کننگ کیرہ۔
