اسلام آباد۔ 20 فروری (اے پی پی) دفترخارجہ نا ترجمان نفیس زکریا پارینے کہ پاکستان کشمیری تے کن دنیا نا ہر فورم آ توار چست کرسا کیک، کشمیر اسہ قومی ئُ ویل اسے و ننے داڑآ اواری اٹ توار چست کننگ نا گرج ئِ۔ دوشنبے آ داڑے پی این سی اے ٹی حریت کانفرنس آزاد کشمیر شاخ انا کنڈآن کشمیر نا بابت اڈ ہلوک آ سیمینار آن تران کریکہ۔ داوخت آ مسکوہی وزیر اطلاعات و نشریات ڈاکٹر فردوس عاشق اعوان و حریت راہشونک ہم تران کریر۔ ترجمان دفتر خارجہ نفیس زکریا پارے کہ ننے غٹ ئِ کشمیر نا توار ئِ درسا مون آ ہنوئی ئِ، حکومت پاکستان کشمیری الس تون تفوک ئِ و ہمیشہ اونا سیاسی ، سفارتی و اخلاقی مخ تفی ئِ برجاہ تخک۔ مقبوضہ کشمیر نا تاریخ ظلم و ستم آن پُر تخوک ئِ کنند پوش پورہ آن بیدس مقبوضہ کشمیر نا تاریخ دُن انگا بے شمار واقعہ غاتیان پرتموک ئِ۔ اوورنانسل آ زور شاغسا پارے کہ او سوشل میڈیا آ مقبوضہ کشمیر اٹی بھارتی بیدادی نا بے نقاب کننگ اٹی تینا پبی کڑد ئِ ادا کیر۔ اوپارے کہ 8 جولائی 2016ءآ برہان مظفروانی نا شہیدی آن پد میڈیا نا کڑد ستاکڑزک، بایدے ورناتے مرے کہ او کشمیر آ پین مطالعہ کیر و دا ڑآ قلم ہرفر، ورناک کشمیر نا بابت ڈرامہ نگاری کیر۔ اوپارے کہ اجتماعی قبرآتا بابت انٹرنیشنل پیپلز ٹربیونل نا رپورٹ اٹی پاننگانے کہ اسہ اسہ قبر اٹی پنچ آن زیات میت دفن کننگانے، بھارتی کوزہ گر فوج انا دا ظلم آن ثابت مریک کہ دا تحریک کشمیری تا خالصتاََ تینا تحریک ئِ۔ پاکستان کشمیری تا تحریک آجوئی کن دنیا نا ہر فورم آ توار چست کرسا کیک۔ نفیس زکریا پارے کہ بھارت کشمیر نا بابت دا پروپیگنڈہ کیک کہ دا ویل انا پد اٹ پاکستان ئِ ، مقبوضہ کشمیر اٹی اجتماعی قبرآتا پاش مننگ آن بھارت نا دا دروغ پاش مسنے، بھارتی فوج کشمیری تا توار ئِ توننگ کن اوفتیا ظلم و ستم نا مش آ بٹے، نن غٹ بایدے کشمیر نا ویل آ تینا کڑد ئِ ادا کین، فردوس عاشق اعوان پارے کہ کشمیری حریت راہشون و قوم ہراکٹھن و مشکل سفر آ روان ئُ اوڑآ اوفتا ثابت گامی ئِ سلام پیش کینہ۔ اقوام متحدہ کشمیری تے حق خودارادیت تسنے، ورکنگ باﺅنڈری آ مننگ نا سوب نن مقبوضہ کشمیر اٹی بھارتی بیدادی نا اندازہ ئِ کننگ کینہ۔ لین آف کنٹرول نا ہڑتوم آ کنڈآک کشمیری تا است اوار دھڑکرہ۔
