ملکی تاریخ اٹی اولیکو وار حکومتی کہول آ پاکستانی نان و تھام تے جہانی کہول آ درستی راستی کرفنگ نا حکمت عملی اس مرتب کننگ انگ ءِ، پروفیسر احسن اقبال

اسلام آباد۔ 20 فروری (اے پی پی) بنجائی وزیر ڈٹ بندی ، شونداری و اصلاحات پروفیسر احسن اقبال پارینے کہ مسکوہی ٹی پاکستانی فوڈ برانڈز نا جہانی کہول آ تشہیر و برانڈنگ آ چکار تخنگ تنے۔ ملکی تاریخ اٹی اولیکو وار حکومتی کہو ل آ پاکستانی نان و تھام تے جہانی کہول آ درستی راستی کرفنگ نا حکمت عملی اس مرتب کننگ انگ ءِ۔ داخیال آتا درشانی ءِ او دوشنبے آ پاکستانی نان و تھام تا بابت صلابتی دیوان اسے آن تران کرسا کرے۔ دیوان اٹی وزارت ڈٹ بندی ، فنانس ڈویژن و وزارت خارجہ امور نا بڑزکو افسر و پنی ریستورن و بشخ انا چاہندارآک بشخ ہلکر۔ بنجائی وزیر پارے کہ اینو نا صلابتی دیوان بے کچ ہی اہم و بے کچ منفرد ءِ۔ ملکی تاریخ اٹی اولیکو وار بنجائی حکومت قومی کہول آ پاکستانی نان و تھام تے جہانی کہول آ درستی راستی کرفنگ کن اسہ ٹھوس حکمت عملی اس تینا کرینے۔ اوپارے کہ حکومت ہر بشخ انا شونداری کن سٹیک ہولڈر آتون صلابت کننگ ءِ۔ نن خوانہ پاکستانی تھام و ایلو ملک آتیانبار مچ آ دنیا ٹی تینا شناخت ءِ جوڑ کننگ کیر۔ اوپارے کہ ننے تینا تھام و اوفتا تشہیر اٹی جدت اختیار کننگ نا گرج ءِ ۔ اوپارے کہ اللہ تعالیٰ پاکستان ءِ ہروڑنا نعمت تسنے، ننا ملک اٹی غٹ وسم ، انواع و اقسام نا میوہ، سوزی و فصل ارے۔ اوپارے کہ ننا تھامک مچ آدنیا نا مقابلہ ٹی بھاز زیات صحت افزاء و اوفتے ٹی تنوع ارے۔ اوپارے کہ پیشن نا ملک معیاری تھام تے کن ریستورن و اوفتا تشہیر نا حکمت عملی اس ننا اولین اولیت مریک۔