قومی احتساب بیورو چیئرمین نیب جسٹس جاوید اقبال نا وژن و ’’احتساب غٹ اکن اسہ وڑ‘‘ نا پالیسی آ عمل کننگ ءِ ، ڈائریکٹر جنرل نیب بلوچستان فرمان اللہ خان

کوءٹہ ۔ 30 جنوری (اے پی پی)کرپشن نا بابت الس نا غاو تے بِننگ کن نیب بلوچستان اٹ کھلی کچہری اس خلنگا ۔ کوءٹہ تون اوار بلوچستان نا مر مر انگا علاقہ غاتیان خلقت نا اسہ بھلو کچ اس دستاویزی شاہدی تے تون اوار پیش مرسا چندی بنجائی و صوبائی محکمہ غاتا کرپٹ آفیسر و کارندہ غاتا برخلاف بدعنوانی و الس تون درو کننگ، مفاد عامہ نا ڈٹ آتے ٹی مبینہ کرپشن نا پیدورای ءِ کریر و ڈی جی نیب آن اوفتیا کارروائی کننگ نا خواست کریر ۔ ڈائریکٹر جنرل نیب بلوچستان فرمان اللہ خان دا وخت آغٹ سوالی تے نیب انا کانود این اے او 1999 نا دنگ اٹ بروک آ غٹ غاوتیا پبی کارروائی نا باوری کرفے ۔ ڈی جی نیب بلوچستان گپ و تران کرسا پارے کہ قومی احتساب بیورو چیئرمین نیب جسٹس جاوید اقبال نا وژن و ’’احتساب غٹ اکن اسہ وڑ‘‘ نا پالیسی آ عمل کننگ ءِ و وطن عزیز آن وڈی خوری نا ناسور نا پورو چٹفنگ کن غٹ وسیلہ غاتے کاریم اٹ اتنگ انگ ءِ ۔ اووڈی خوری نا پورو چٹفنگ کن غٹ مکاتب فکر انا کرپشن آن خار انا جوزہ غاتا مون آ دننگ ءِ المی گوندسا پارے کہ قومی احتساب بیورو کرپشن نا کیس آتا جاست وپاست اتون اوار اوار غٹ مکاتب فکر اتون شعور و آگاہی نا مہم ہم سرسہبی اٹ چلیفنگ ءِ ۔ نیب بلوچستان الس تون درو کننگ نا کیس آتا جاست وپاست ءِ میرٹ نا رداٹ کننگ ءِ ولے واءٹ کالر کرائم ءِ ایسر اسکان سرکننگ و کانود نا گرفت اٹ اتنگ کن وخت درکار مریک ۔ اوکرپشن نا توننگ کن الس نا بشخ ہلنگ نا گرج آ زور شاغسا پارے کہ قومی خزانہ ءِ نسخان تروک آتا پیدواری ءِ کننگے ، نیب پبی کارروائی کیک ۔