بنجائی وزیر بین الصوبائی رابطہ ڈاکٹرفہمیدہ مرزا تون بیلا روس نا سفیر نا اوڑدہی

اسلام آباد ۔ 30 جنوری (اے پی پی) بنجائی وزیر بین الصوبائی رابطہ ڈاکٹر فہمیدہ مرزا پارینے کہ پاکستان سیل و سوات و گوازی تا پڑ اٹ بے پناہ لاءخی تا مالک ءِ ، گوازی تیٹی، خاص وڑاٹ ہاکی و فٹ بال اٹ نن بیلا روس آن بھاز گڑا ہیل کننگ کینہ ۔ داخیال آتا درشانی ءِ او پنچ شنبے نادے آ بیلا روس نا سفیر تون اوڑدہی ٹی گپ و تران کرسا کرے ۔ اوڑدہی ٹی بیلاروس نا سفیر اودے گوازی و سیل وسوات نا پڑاٹ ہڑتوم آ کنڈآتا کمکاری ءِ ودفنگ کن بیلا روس نا دورہ نا سلہ ءِ ہم خلک ۔ داوخت آ فہمیدہ مرزا پارے کہ پاکستان سیل و سوات و گوازی تا پڑ اٹ بے پناہ لاءخی تا مالک ءِ ۔ گوازی تیٹی ، خاص وڑاٹ ہاکی و فٹبال اٹی نن بیلا روس آن بھاز گڑا ہیل کننگ کینہ ۔ اوپارے کہ مستین اٹی ہم بے شمار مفاہمت پن تیا دستخط کننگا ولے داکان پد ہچ ءُ عملی کارروائی اس نظر بتنے ۔ اوپارے کہ داسہ مفاہمت پن تیا عملدرآمد کننگ نا گچین ءُ وخت اسے ۔ بنجائی وزیر پارے کہ اسیجا وزارتی کمیشن نا دیوان مارچ اٹ اڈ ہلنگ ءِ ۔ کشت وکشار، صنعت، سیل و سوات و واپار ءِ ہم دا میٹنگ نا کمک اٹ سوگوی بایدے تننگے ۔ اوپارے کہ غٹ گوازی گر آتے آسراتی فراوان کننگ کن پاکستان اسپورٹس کمپلیکس نا اپ گریڈیشن نا عمل برجاءِ ۔ ڈاکٹر فہمیدہ مرزا بیلاروس نا سفیر ءِ قطبی علاقہ غاتا دورہ ءِ کننگ و شندور فیسٹیول اٹ بشخ ہلنگ نا سلہ خلکونے ۔