کوئٹہ۔ 20 فروری (اے پی پی) نیب بلوچستان میگاکرپشن کیس اٹی یونین کونسل خالق آباد و مچھ اٹی 2 ارب 24کروڑ نا نغڑدنگ نا جاست وپاست اٹی مسکوہی سلاہکار خزانہ بلوچستان میر خالد لانگو، مسکوہی سیکرٹری خزانہ بلوچستان مشتاق رئیسانی ، مسکوہی سیکرٹری لوکل گورنمنٹ ، مسکوہی سیکرٹری لوکل گورنمنٹ بورڈ، ٹھیکیدار سہیل مجید شاہ و نوراللہ نا برخلاف ریفرنس احتساب عدالت اٹی جمع کرفے۔ نیب انا جاست وپاست نا رداٹ 2013ء آن مئی 2016ء ٹی محکمہ لوکل گورنمنٹ آن یونین کونسل مچھ و خالق آباد کن 2 ارب 31کروڑ روپئی نا گرانٹ ریلیز کرفنگا ہراٹی بیرہ 57ملین روپئی ہندا یونین کونسل تیٹی خڑچ کننگا وخت اس کہ ایلو ماندہ 2ارب 24کروڑ روپئی نا پیسہ غاتے نغڑدنگا۔ دوبہ دارآتا اکاؤنٹ آتا چھان بین و منی ٹریل آن پد بے کچ کم وخت اسے ٹی دوبہ دار آتا برخلاف ریفرنس احتساب عدالت اٹی جمع کرفنگانے۔ داکان مست ، نیب لوکل گورنمنٹ فنڈ اٹی نغڑدنگ نا جاست وپاست اٹی مسکوہی سیکرٹری خزانہ بلوچستان مشتاق احمد رئیسانی نا اُرا غا چھاپہ خلسا 65کروڑ روپئی نغدی و زیورات دوئی کرے وخت اس کہ مسکوہی سلاہکار خزانہ خالد لانگو تون اوار ایلو دوبہ دارآتے ہم دزگیر کرے۔ خزانہ کیس انا جاست و پاست برجاہ ءِ۔ ڈی جی نیب بلوچستان میجر ریٹائرڈ طارق محمود ملک ملک آن کرپشن نا تدارک کن زیروٹالرنس نا عزم انا اعادہ کرسا پارینے کہ کرپٹ عنصر آتے السی ویل آتیا دوتے صفا کننگ کن الیپنہ۔ کانودی ضابطہ غاتے کاریم اٹ اتسا کرپٹ عنصر آتے سزا ترفنگے۔ اومستی پارے کہ نیب اخلاص نا جوزہ آن سرشار مرسا کرپشن نا چٹفنگ و ادارہ غاتا سوگوی نا جنگ ءِ کننگ ءِ ہراٹی غٹ مکاتب فکر انا تائید المی ءِ۔ ادارہ غاتا سوگوی ، السی تائید و کمکاری آن بیدس مننگ کپک۔ او بے جاست و پاست خبرآتا نشرو اشاعت نا چرجوئی نا نفی ءِ کرسا پارے کہ خبر نا نشرو اشاعت آن مست تعلقدار معلومداری تا بایدے تصدیق مرے۔
