مزن وزیر عمران خان ءِ پنت ءُُ شون
اسلام آباد۔ 29 جنوری (اے پی پی) مزن وزیر عمران خان ءَ گوشت کہ گندم (آرت) بنیاتی ضلورت انت، اے ھوالگ ءَ الس کجام ھم رنگے کمیگ ءَ گوں دیم پہ دیم مہ بنت، ملکی ضلورت آنی رد ءَ گندم سرجم کنگ ءِ دل یکیمی ءِ واستہ ھمک رنگ ءِ گامگیج چست کنگ بہ بیت، امبار آں چیر دیوک آنی ھلاپ ءَ کاروائی کنگ ءُُ ناجائزیں رنگ ءَ سیت گروک آنی گر ءُُ دار ءِ سر ءَ دلگوشی دیگ لوٹ ایت۔ آ چار شمبے ءِ روچ ءَ گندم ءِ جاور ھال، ملکی ضلورت، استیں سٹاک ءُُ آیوکیں باندات ءِ ضلورت آنی پیلو کنگ ءِ ھوالگ ءَ گامگیج آنی واستہ دیوان ءِ سروکی ءَ کنگ ءَ ات۔ دیوان ءَ وزیر برائے نیشنل فوڈ سیکورٹی مخدوم خسرو بختیار، وزیر ءِ منصوبگ بندی اسد عمر، وزیرِ ھاٹیگ عمر ایوب، مشیر ءِ ھزانگ ڈاکٹر عبدا لحفیظ شیخ ءُُ کلانہ ایں اپسرگ آں بھر زوری کت۔ سیکرٹری فوڈ سیکیورٹی ءَ دیوان ءَ گندم ءِ ھوالگ ءَ ھواریں جاور ھال، گوستگیں سال ءَ گندم ءِ پیداوار، ملکی کمیگ، گوستگیں وھد ءَ گندم ءِ برگ ءُُ آرگ ءُُ استیں جاور ھال، گندم ءُُ آرت ءِ ھوالگ ءَ استیں روچ ءَ پیش آیوکیں جاور ھال ءُُ ایشانی سبب آنی سر ءَ بریفنگ دات۔ مزن وزیر ءَ پنت ءُُ شون کت کہ آیوکیں ماھ ءَ گندم ءِ ضلورت ءِ سرجم کنگ ءِ واستہ پیشوکی منصوبگ بندی کنگ بہ بیت ءُُ اے رد ءَ ھد ءُُ ابیل ءُُ کار رپک آناں زوت پکوئیں رنگ دیگ بیت۔
