جینوا/اسلام آباد۔ 29 جنوری (اے پی پی) تحریک کشمیر یورپ نا خواست آ تحریک کشمیر سوئٹزر لینڈ نا کنڈآن 5 فروری یوم یکجہتی کشمیر نا وخت آ جنیوا ٹی اقوام متحدہ نا کمیشن انسانی حق انا ہیڈ کوارٹرز نا مون آ برانزی مچی اس کننگک، ہرانا مسخت مقبوضہ کشمیر نا مظلوم و محکوم الس تون پورو یکجہتی نا درشانی ءِ کننگ ءِ۔ تحریک کشمیر یورپ سوئٹزرلینڈ نا کنڈآن جاری کروک آ بیان نار داٹ تحریک کشمیر سوئٹزر لینڈ نا صدر چوہدری اعجاز طاہر، جنرل سیکرٹری یامین سید و نائب صدر میاں عامر ئسک پارینو کہ آجوئی نا جہد اٹ اوتنیا افس اوفتا قربانیک رنگ اس اتیرہ، بھارتی سازش و چم بازی تے بے نقاب کننگک، بھارت نا مکروہ و گندہ انگا دروشم دنیا نا مون آ پیش کننگک، بھارت نا ظلم و ستم کشمیری تا حوصلہ ءِ شیف خلنگ کپک، شش تُو پدریسہ کرفیو آن پد ہم کودک کشمیری الس بھارتی درندہ صفت فوج انا مون آ سختی اٹ سلوک ءُ ہرا بھارت کن نوشتہ دیوال اسے۔ اوپارے کہ بھارت کشمیر آن پیش تمے۔ اوپارے کہ 5پنچ فروری آ مچ آ دنیاٹی کشمیری تتون یکجہتی نا درشانی ءِ کرسا اوفتا است بڈی ءِ کننگک و دنیا ءِ کلہو تننگک کہ بھارت اسہ ظالم و قاتل و انسانیت نا دشمن ملک اسے۔ بھارت نام نہاد جمہوریت نا لویس اٹ کشمیری تا نسل کشی و دنیا ءِ درو تننگ ءِ، کشمیری تا جمہوری حق ءِ لتاڑنگ ءِ۔ بھارت جہانی معاہدہ غاتا خلاف ورزی ءِ کرسا طاقت نا زی آ کشمیر آ غاصبانہ کوزہ کرینے وخت اس کہ کشمیری بھارتی تسلط ءِ امنا کننگ کن تیار افس و دا مشکل و سنگین تر حالیت آتے ٹی ہم استقامت نا درشانی ءِ کننگ ءُ۔
