اوغان صدر نا ساڑی ٹویٹ پاکستان نا تہہ نا باندات آتے ٹی نیام تمنگ آنبار ءِ
اسلام آباد۔ 28 جنوری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ اوغان صدر اشرف غنی نا ساڑی ٹویٹ پاکستان نا تہہ نا باندات آتے ٹی نیام تمنگ آنبار ءِ، اوغان سرکڑدہ غاک دُن انگا بیان تیان مست جہانی تعلقداری تیٹی نیام تمپننگ نا اصول آتے مون آ تخر۔ ڈاکٹر فردوس عاشق اعوان سے شنبے نادے آ تینا ٹویٹ اٹی پارے کہ پاکستان ڈیہہ ٹی امن و سوگوی نا داعی ءِ، اوغانستان اٹ امن نا اسیجا مسخت آتا دوئی کننگ کن اواری اٹ کاریم کننگ نا خواہندار ءِ۔ اوپارے کہ پاکستان وتواجہ ءُ ریاست اسے، آئین پاکستان آن تہل تموک آتون کانود نا رداٹ کارروائی پاکستان نا کانود ءِ، پین ملک اسے ایلو ملک اٹی کانود نا بالادستی نا برخلاف ہیت کننگ سفارتی خواست آتیان چپ ءِ۔ ڈاکٹر فردوس عاشق اعوان پارے کہ پاکستان نا بہادر سلہہ بند فوج و غیور الس تینا دتر اٹ امن نا چراغ آتے روشنا کرینو، ہچ کسءِ امن تون گوازی کننگ نا موکل تفننگک، دُن انگا خلقت نا برخلاف کانود تینا کسرءِ تینٹ جوڑ کیک۔
