اسلام آباد۔ 28 جنوری (اے پی پی) بنجائی وزیر بین الصوبائی رابطہ ڈاکٹر فہمیدہ مرزا پارینے کہ وزارت بین الصوبائی رابطہ نا کنڈآن زالبول آتا گوازی تیٹی بشخ ہلنگ کن گام گیج کننگانے و زالبول آتا گوازی تیٹی بشخ ہلنگ نئے بیرہ ملکی بلکن جہانی کہول آ ہم بھاز اہمیت تخک۔ داخیال آتا درشانی ءِ او سے شنبے نادے آ پاکستانی نژاد کینیڈا نا پارلیمنٹرین سلمہ عطاء اللہ جان تون اوڑدہی ٹی کرے۔ اوسینیٹر سلمہ نا زالبول آتے واکدار کننگ نا غٹ کوشست آتا ستاءِ کرسا پارے کہ نا پاکستان آ بننگ آ است اٹ خوشی مسنے و زالبول آتا سیاسی پڑاٹ کڑد اٹ کمک کننگ کن اونا کوشست آتے امنا کینہ۔ بنجائی وزیر زالبول آتے واکدار کننگ و اوفتا حق ءِ اولیت تننگ کن وزارت نا کنڈآن چست کروک آ غٹ گام گیج آتا بارواٹ سینیٹر ءِ معلومدار کرے۔ اوپارے کہ وزارت بین الصوبائی رابطہ نا کنڈآن زالبول آتا غٹ گوازی تا بشخ آتے ٹی بشخ ہلنگ کن مدام گام گیج چست کننگانے و زالبول آتا گوازی تیٹی بشخ ہلنگ نئے بیرہ ملکی کہول آ بلکن جہانی کہول آ ہم بھاز اہمیت تخک۔ بنجائی وزیر پاکستان اٹ معاشی شونداری کن زالبول آتا کڑد انا اہمیت ءِ مون آ تخا و پارے کہ نئے بیرہ معاشی شونداری کن زالبول آتا کڑد بھاز اہمیت تخک بلکن سیاسی و راجی کہول آ ہم بھاز اہمیت تخک۔ ڈاکٹر فہمیدہ مرزا سینیٹر ءِ معلومدار کرے کہ ساڑی حکومت زالبول آتا حق و اوفتے واکدار کننگ نا بابت بھاز انگا کانود آتے جوڑ کرینے و اوفتا لائخی تے مون آ دننگ و دا بابت پلیٹ فارم اس فراوان کننگ آہم بھاز زور شاغنگ انگ ءِ۔
