ننکانہ صاحب۔ 28 جنوری (اے پی پی) بنجائی وزیر داخلہ اعجاز احمد شاہ پارینے کہ ملکی دفاع سوگو انگا دوتے ٹیءِ، پاکستان نا کنڈا ہروک آ ہر خراب انگا خن تے ترخفینہ، ملکی زرگزران گچینی نا کنڈا ہِننگ ءِ۔ داخیال آتا درشانیءِ او داڑے چندی میونسپل و ٹاؤن کمیٹی تا پوسکن گچین مروک آ عہدیدار آتا سوغندی دود آن بطور مہمان خاص تران کرسا کرے۔ دود اٹ پاکستان تحریک انصاف سنٹرل پنجاب نا صدر اعجاز چوہدری ہم ساڑی ئس۔ دود آن تران کرسا بنجائی وزیر داخلہ پارے کہ حکومت نا گام گیج آتا سوب ملکی زرگزران گچینی نا کنڈا ہِننگ ءِ۔ بھارتی آرمی چیف نا دھڑکو تا حیثیت”جوگرجتے ہیں وہ برستے نہیں“ آنبار ءِ۔ اوپارے کہ ملکی دفاع سوگو انگا دوتے ٹیءِ، پاکستان نا کنڈا ہروک آ ہر خراب انگا خن تے کشنہ۔ اوپارے کہ کارندہ غاک پاکستان تحریک انصاف نا نہادی میرات ءُ، اوفتا ویل آتا ایسری کن ہروڑنا گام گیج کینہ۔ اوپارے کہ گچین حکومتی پالیسی تا سوب ملکی حالیت آک ترندی اٹ گچینی نا کنڈا ہِننگ ءُ، مفاد پرست آتا کنڈآن ملک اٹ نت انا تینا خود آن تنکی ودی کننگ نا کوشست کننگا ہر ا وخت آ حکومتی گام گیج آتا سوب آن بے سہب مسنے۔ اوپارے کہ مسکوہی حکومت آک ڈالر نا نہاد ءِ مصنوعی سیبو تسوسر۔ وزیراعظم عمران خان نا کماشی ٹی پاکستان ءِ پرامن، شون ہلوک و شونہال ملک اس جوڑ کننگ نا سفر ءِ برجاتخنہ۔
