اسلام آباد۔ 28 جنوری (اے پی پی) اسپیکر قومی اسمبلی اسد قیصر پارینے کہ حکومت ءِ دم دروک زرگزران میرات اٹی ملانے ہرادے گچین کننگ کن گام گیج کننگ انگ ءِ، قومی ویل آتا حامل باندات آتیا کانود جوڑ کننگ پارلیمنٹ نا زمواری ءِ، سی پیک پاکستان خاص کر گلگت بلتستان نا شونداری ٹی اہم ءُ کڑد اس ادا کیک، سی پیک نا رداٹ برجا ڈٹ آتا پوروی آن گلگت بلتستان اٹی شونداری و شونہالی نا کسرآک ملنگرہ۔ داخیال آتا درشانی ءِ او سے شنبے نادے آ اسپیکر گلگت بلتستان اسمبلی فدامحمد نوشاد تون اوڑدہی ٹی کرے۔ اوڑدہی گلگت بلتستان اٹی برجا شونداری ڈٹ آتون اوار کانود جوڑ کننگ نا بابت اہم باندات آتیا گپ وتران کننگا۔ اوڑدہی ٹی اسد قیصر پارے کہ ملک معاشی ویل آتا گواچی ءِ ہراڑتون مون تننگ کن ساڑی حکومت مشکل فیصلہ کرینے۔ حکومت ءِ دم دروک زرگزران میرات اٹ ملا ہرادے گچین کننگ کن گام گیج کننگ انگ ءِ۔ قومی ویل آتا حامل باندات آتیا کانود جوڑ کننگ پارلیمنٹ نا زمواری ءِ۔ اوپارے کہ سی پیک پاکستان خاص کر گلگت بلتستان نا شونداری ٹی اہم ءُ کڑد اس ادا کیک۔ سی پیک نا رداٹ برجا ڈٹ آتا پوروی آن گلگت بلتستان اٹی شونداری و شونہالی نا کسرآک ملنگرہ۔ اوپارے کہ سیل و سوات نا اعتبار اٹ ننا قطبی علاقہ خاص کر گلگت بلتستان دنیا نا چکار نا وت ءِ۔ سیل و سوات ءِ مون آدننگ نا کمک اٹ نن علاقائی پسماندگی و بے روزگاری نا مون ءِ توننگ کینہ۔ اسپیکر اسد قیصر پارے کہ مقبوضہ کشمیر اٹی جاری بھارتی جارحیت ڈیہہ ٹی خوفناک انسانی المیہ اس ودی مسنے۔ جہانی برادری مقبوضہ کشمیر نا ساڑی سنگین حالیت آتا نوٹس ءِ ہلے و کشمیر نا ویل انا دمدستی ایسری کن گام گیج کے۔ داوخت آاسپیکر گلگت بلتستان پارے کہ بنجا و صوبہ غاتا نیام اٹ رابطہ غاتا مون آ دننگ آن ملک ءِ مون تروک ویل آتا مون ءِ توننگ مریک۔ بنجائی حکومت گلگت بلتستان نا ویل آتیا خصوصی چکار کے۔ اوپارے کہ قومی اسمبلی و گلگت بلتستان اسمبلی نا باسک آتے ٹی رابطہ غاتیان کانود جوڑ کننگ و آزموندہ غاتیان فائدہ دوئی کننگ مریک۔ ساڑی حکومت نا زرگزران نا گچینی کن گام گیج ستاکڑزک۔ مقبوضہ کشمیر اٹی برجا کرفیو نام نہاد بھارتی جمہوریت نا بوز آ چپانٹ اسے۔ اوپارے کہ جہانی برادری و اقوام متحدہ مقبوضہ کشمیر اٹی بھارتی بیدادی نا برخلاف توار بلند کے۔
