اسلام آباد۔ 20 فروری (اے پی پی)صدرمملکت ممنون حسین بھلو وخت اسسکان انسانیت نا خذمت کروک آ ادارہ غاتا اڈتننگ نا گرج آ زورشاغسا پارینے کہ رنگ، نسل ، مذہب و ملت نا پرخ آن بیدس راجی خذمت ہی اصل خذمت ءِ۔ صدر مملکت داہیت ءِ ایوان صدر اٹی لائنز کلب انٹرنیشنل نا عہدیدار آتون اوڑدہی ٹی پارے۔ اوڑدہی ٹی صدر مملکت پارے کہ پاکستان دنیا ٹی خذمت خلق و مالی ایثار نا روایت نا بابت سرفہرست ءِ ۔ اوپارے کہ ضرورت مند آتا کمک انسانیت نا معراج ءِ و مخیر شخصیت و ادارہ غاتے پورو یکسوئی اتون السی شرحالی ڈٹ آتا اڈتننگ اٹی زیات آن زیات بایدے بشخ ہلیر۔ صدر مملکت پاکستان اٹی لائنز کلب نا خذمت آتا ستاءِ کرسا پارے کہ پاکستان نا غیرمراعات یافتہ تپہ و ضرورت مند آتے اوفتا بنداوی گرج آتا فراوانی کن لائنز کلب اہم کڑد ادا کننگ ءِ، نسل، مذہب و ملت نا پرخ آن بیدس لائنز کلب نا راجی خذمت آک ستاکڑزرہ۔ اوپارے کہ پاکستان نا پسماندہ تپہ غاتا خذمت کن ایوان صدر نا کمک لائنز کلب ءِ ہمیشہ دوئی مریک۔ داوخت آ صدر مملکت ءِ لائنز کلب نا کنڈآن ہیڈ آف اسٹیٹ میڈل ہم پیش کننگا۔
