اسلام آباد۔ 27 جنوری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان نا کماشی ٹی الس نا شونہالی و شونداری نا ایجنڈا ءِ پورو طاقت اٹ مون آ دینہ، سیاسی طوفان برپا کننگ نا است خواہی تخوک آتا ارمان تے دیر درینے، جمہوری اختلافءِ سازش نا رنگ تروک آک سیاسی مخالف آتے اطلاع مرے کہ حکومت تینا سیوتی تا مخ تفی اتون نئے بیرہ سوگو ءِ بلکن جمہوری اختلاف ءِ جمہوری وڑاٹ ایسر کننگانے۔ دوشنبے نادے آ تینا ٹویٹ اٹی وزیراعظم نا خصوصی کمکار پارے کہ ویل و محرومی تا گواچی سندھ اکن وزیراعظم عمران خان خوشخبری اس مرسا کراچی آ ہنا۔ سندھ انا ورناتے مایوسی آن نجات ترفنگ کن سرسہب ورنا پروگرام نا دنگ ءِ کراچی اسکان ودفنگانے، دا پروگرام سندھی ورناتا تغ تا تعبیر نا کنڈا اہم ءُ گام اس مریک۔ ڈاکٹر فردوس عاشق اعوان پارے کہ ورناک ننا نہادی میرات ءُ، اوفتے واکدار کننگ وزیراعظم عمران خان نا وژن ءِ، ورناتے کن زند اٹی مون آ ہِننگ نا وارخواہی ودی کننگ، شونداری نا عمل اٹ شریدار کننگ و معاشی پہیہ ءِ ترند کننگ کن دا گام گیج آک المی ءُ۔ اوپارے کہ وزیر اعظم عمران خان ورناتا اومیت ءُ، آسان وام تا فراوانی و مالی کمکاری اوفتے کاروبار کننگ و واکدار کننگ نا کنڈا اہم ءُ مزل نا نشان اس مریک۔ اوپارے کہ سندھ انا ورناتا شونداری بنجا پاکستان ءِ سوگو کننگ آنبار ءِ۔
