اسلام آباد۔ 27جنوری (اے پی پی) وزیراعظم نا خصوصی کمکار ہیلتھ ریگولیشن اینڈ کوآرڈنیشن ڈاکٹر ظفر مرزا پارینے کہ کرونا وائرس آن الس ءِ بچفنگ کن سوگو و گچین گام گیج آتے پک کننگ اُن، اسلام آباد تون اوار غٹ بھلا بالی پٹ آتیا سکریننگ کاؤنٹر جوڑ کرینن غٹ ہسپتال آتا سروک آتے ایمر جنسی حالیت آتون مون تننگ کن گام گیج آتے پک کیر۔ داخیال آتا درشانی ءِ او کرونا وائرس آن بچفنگ کن جاچ دیوان نا کماشی ٹی کرے۔ دیوان اٹ میجر جنرل ڈاکٹر عامر اکرام سروک قومی ادارہ جا ن جوڑی ڈی جی ہیلتھ، پاکستان اٹ جہانی ادارہ جان جوڑی نا نمائندہ ڈاکٹر پلیتھاماہی پالا و غٹ سرکاری ہسپتال آتا سروک آک بشخ ہلکر۔ دیوان اٹ کروناوائرس آن بچنگ کن داوخت اسکان کروک آ گام گیج آتا جاچ ءِ ہلنگا۔ داوخت آ ڈاکٹر ظفر مرزا پارینے کہ چین اٹ کم و ود 890 کیس و 26مرک رپورٹ مس، کرونا وائرس آن الس ءِ بچفنگ کن سوگو و گچین گام گیج آتے پک کننگ اُن، اسلام آباد تون اوار غٹ بھلا بالی پٹ آتیا سکریننگ کاؤنٹر جوڑ کرینے۔ اوپارے کہ چین آن بروک آ غٹ مسافر آتا سکریننگ کننگ انگ ءِ، سکریننگ اٹ مسافر آتا میڈیکل ہسٹری نا جاچ ءِ ہلنگک، غٹ بالی پٹ آتیا کرونا وائرس نا بارواٹی معلوماتی مواد کن کاؤنٹر اس جوڑ کننگ نا فیصلہ کرینن۔ خصوصی کمکار پارے کہ غٹ ہسپتال آتا سروک آتے ایمرجنسی حالیت آتون مون تننگ کن گام گیج آتے پک کیر، حالیت آتا پدریسہ چاروکی ءِ کننگ کن چینی سفیر و جہانی ادارہ جان جوڑی تون رابطہ ٹی اُن۔ ڈاکٹر ظفر مرزا پارے کہ پاکستان اٹی داوخت آ 19انٹر پوائنٹ جوڑ کننگانے، سست بارڈر چین اٹی ہم پاکستان نا اہم ءُ انٹری پوائنٹ ارے، سست بارڈآ ہن و بر و برف انا سوب آن اپریل اسکان بند مریک۔ اوپارے کہ پاکستان اٹی ہم داوخت اسکان کرونا وائرس نا ہچ ءُ کیس اس مون آ بتنے۔
