یوم یکجہتی کشمیر اینخو نا سال پبی وڑاٹ اڈتننگک،دادے آ لس چھٹی مریک، صدر مملکت ڈاکٹر عارف علوی ایوان صدر اٹ درملکی سفیر آتا دود آن تران کیک

اسلام آباد۔ 27جنوری (اے پی پی) یوم یکجہتی کشمیر ءِ اینخو نا سال پبی وڑاٹ اڈتننگک دادے آ لس چھٹی مریک، وزیراعظم پاکستان عمران خان مظفر آباد اٹ آزاد جموں و کشمیر کانود ساز اسمبلی و کشمیر کونسل نا اسیجا دیوان آن تران کیک وخت اس کہ صدر مملکت ڈاکٹر عارف علوی ایوان صدر اٹ درملکی سفیر آتا دود آن تران کیک۔ وزیر امور کشمیر و گلگت بلتستان علی امین گنڈاپور پارے کہ بھارت نا کنڈآن مقبوضہ کشمیرنا خصوصی حیثیت نا چٹفنگ و کیہی تُو آن لاک ڈاؤن نا سوب آن اینخو نا سال یوم یکجہتی کشمیر معمول آ پین وڑاڈتننگک۔ کشمیری تا جہد آجوئی آ ہچ ءُ سمجھوتہ اس کننگپک و حق خودارادیت اسکان اوفتا سیاسی، سفارتی و اخلاقی مخ تفی ءِ برجاتخنہ۔ دوشنبے نادے آ کشمیر کونسل سیکرٹریٹ اٹی وزیر امور کشمیر نا کماشی ٹی بڑزکو کہول انا دیوان اس مس ہراٹی 5فروری آ یوم یکجہتی کشمیر نا بابت تیاری تا جاچ ءِ ہلنگا۔دیوان ءِ پاننگاکہ وزیراعظم عمران خان نا پرمان تے مون آ تخسا اینخو نا سال یوم یکجہتی کشمیرءِ پبی وڑاٹ اڈتننگک دادے انا مناسبت اٹ یات گاری ڈاک ٹکٹ اس جاری کننگک، دادے آ لس چھٹی مریک۔ دا سال یوم یکجہتی کشمیرنا چرجوئی ٹی دود آتا بنا27 جنوری آن کننگانے۔ 3 فروری آ کنونشن سینٹر اٹ مچی اس مریک ہراڑان سیاسی سرکڑدہ غاک تران کیرہ۔ ہندادے کشمیر کونسل نا باسک آک 7400 باہوٹ خاہوت آتے ٹی راشن بشخرہ۔ آزاد کشمیر و پاکستان ءِ ملفوک آ غٹ ہم پلہ غاتیا انسانی دوتا زمزیر اس جوڑ کننگک۔ ہر چار آ صوبائی دارالحکومت آتے ٹی ریلی تیان صوبائی وزیراعلاک تران کیرہ وخت اس کہ ہر ضلع نا کہول آ ریلی اڈتننگک۔