31جنوری آن کفالت پروگرام نا رداٹ نیزگاری زالبول آتے کن ڈیجیٹیل زرتس نظام نا بناءِ کننگ انگ ءِ، ڈاکٹر ثانیہ نشتر

پشاور۔ 27 جنوری (اے پی پی) وزیراعظم نا خصوصی کمکارمعاشرتی رکھ و نیزگاری نا چٹفنگ ڈاکٹر ثانیہ نشتر پارینے کہ وزیراعظم عمران خان ”کفالت“ پروگرام ءِ ساف وڑتیا مبنی ڈیجیٹل زرتس نا نظام اس بناکیک، ہرانا رداٹ رجسٹرڈ زالبول آتے 2000روپئی تُوئی وظیفہ ادا کننگک۔ داخیال آتا درشانی ءِ او بینک الفلاح پشاور اٹ بینظیر انکم سپورٹ پروگرام نا حقدار بندغ آتے کن بائیو میٹرک سسٹم نا بناءِ کننگ آن پد پریس کانفرنس آن تران کرسا کرے، اوپارے کہ وزیراعظم 31جنوری آ نیزگار زالبول آتے راجی و معاشی وڑاٹ واکدار کننگ کن کفالت پروگرام نا بناءِ کیک، اوپارے کہ دا سسٹم 10 تُو انا وخت اٹ پورو مسنے، ہرانا رداٹ نیزگار ؤزالبول آتے وظیفہ حبیب بینک و بینک الفلاح نا شاخ تا کمک اٹ باآسانی ملک، اوپارے کہ حقدار بندغ آتے شفاف میکانزم نا رداٹ اے ٹی ایم نا کمک اٹ زَر تننگک تانکہ اوفتے باوقار وڑاٹ وظیفہ نا پیسہ غاک ملنگ کیر، ڈاکٹر ثانیہ پارے کہ داپروگرام ءِ مرحلہ وار وڑاٹ بناکننگک و اولیکو مرحلہ ٹی کفالت پروگرام لکی مروت، ہری پور، چارسدہ ومہمند ضلع غاتے ٹی بناکننگ انگ ءِ، اوپارے کہ اوار مروک ضلع غاتون اوار صوبہ نا غٹ علاقہ غاتے ٹی دا پروگرام ءِ بناکننگک۔ اوپارے کہ وزیراعظیم کثیر الجہت احساس پروگرام نا رداٹ راج انااختہ مروک آ تپہ غاتے معاشی وڑاٹ گچین کننگ نا خواہندار ءِ، اوپارے کہ اوار مروک ضلع غاتے ٹی نیزگاری نا تناسب صوبہ نا ایلو علاقہ غاتانسبت زیات ءِ و زوت نیزگاری نا بابت اسہ جامع سروے اس بناکننگ انگءِ، ڈاکٹر ثانیہ نشتر پارے کہ 8 لکھ بیست ہزار اسہ سدءُ 65ناجائز فائدہ ہرفوک آتے بے نظیر انکم سپورٹ پروگرام نا فہرست آن کشنگانے ہرافتیان 1لکھ چل ہزار سرکاری ملازم ئسر ہرافتے ٹی ریلوے، پوسٹ آفس، و بی آئی ایس پی نا ملازم آک ہم اوار ئسر، ڈاکٹر ثانیہ نشتر پارے کہ بی آئی ایس پی نا چار آفیسر آتے برخاست و ارٹ ءِ شوکاز نوٹس جاری کننگانے۔ اوپارے کہ کارروائی کن ناجائز فائدہ ہرفوک آ غٹ ملازم آتا فہرست آتے بنجائی و صوبائی حکومت آتے گدریفنگانے۔ اوپارے کہ حکومت نا کنڈآن نیزگار الس و مسافر آتا آسراتی کن ڈغار نا فراوانی آن پد پشاور جنرل بس اسٹینڈ آ لنگر خانہ اس جوڑ کننگ انگ ءِ۔ خیبر پختونخوا حکومت نا ترجمان اجمل وزیر پارے کہ احساس پروگرام آن صوبہ غاتون اوار اوار اوار مروک ضلع غاتا نیزگار الس ہم فائدہ ہرفک، اوپارے کہ وزیراعظم نا ویژن نا رداٹ اوار مروک ضلع غاتا نیزگار مریض آتے آب اٹ درمان نا فراوانی کن جان جوڑی انصاف کارڈ فراوان کننگ انگ ءِ، اوپارے کہ وزیراعظم نا وژن نا رداٹ پشاور تون اوار خیبر پختونخوا نا ایلو ضلع غاتے ٹی پناہ گاہ جوڑ کننگانے ہراڑے نیزگارخلقت ءِ مفت خور، ہنکین و ٹرانسپورٹ نا آسراتی فراوان کننگ انگ ءِ، اوپارے کہ بے نظیر انکم سپورٹ پروگرام نا رداٹ درخواست تروک آتا رجسٹریشن ءِ آسان کننگانے تانکہ اوفتا مالی کمکاری ٹی آسانی مرے۔