اسلام آباد۔ 27 جنوری (اے پی پی) جاری مالی سال اٹی امریکہ پاکستانی برآمد آتا غٹ آن بھلا ملک انا حیثیت اٹ مون آ بسنے وخت اس کہ چین و برطانیہ بالترتیب ارٹ میکو و مسٹ میکو نمبر آٹو۔ اسٹیٹ بینک آف پاکستان نا رداٹ جولائی آن ہلیس دسمبر 2019ء نا وخت اٹی امریکہ ءِ 2.074ارب ڈالر نا مالیت برآمدات کننگا۔ دا کچ تدوک آ مالی سال انا ہندا وخت انا مقابلہ ٹی 2.74درسد زیاتءِ۔ تدوک آ مالی سال انا بنائی 6تُو اٹی امریکہ ءِ 2.018ارب ڈالر نا برآمد ریکارڈ کننگاسس۔ مالی سال نا اولیکو شش تُو اٹی چین ءِ 936.85 ملین ڈالر نا برآمدات کننگا۔ تدوک آ مالی سال نا ہندا وخت اٹی چین ءِ 889.64ملین ڈالر نا برآمد کننگاسس۔ اسہ سال انا وخت اٹی چینءِ برآمد آتے ٹی 5.30درسد ودکی ریکارڈ کننگانے۔ حساب وکتاب نا رداٹ جاری مالی سال اٹی برطانیہ ءِ پاکستانی برآمد آتے ٹی 3.54 درسد کمتی نظر بسنے۔ داوخت اٹی برطانیہ ءِ 863.34ملین ڈالر نا برآمدات کننگا تدوک آ مالی سال انا ہندا وخت اٹی برطانیہ ءِ 895.074ملین ڈالر نا برآمد ریکارڈ کننگاسس۔ جاری مالی سال اٹی متحدہ عرب امارات ءِ پاکستانی برآمد آتے ٹی ودکی نا کچ 29.69 ئس۔ داوخت اٹی یو اے ای ءِ 827.73ملین ڈالر نا برآمد ات کننگا تدوک آ مالی سال انا ہندا وخت اٹی یو اے ای ءِ پاکستانی برآمد آتا کچ 638.22ملین ڈالر ریکارڈ کننگاسس۔ حساب وکتاب نا رداٹ داوخت اٹی جرمنی ءِ 630.83ملین ڈالر و اوغانستان ءِ 543.15ملین ڈالر نا برآمدات کننگا۔
