بیجنگ۔ 27 جنوری (اے پی پی) چین اٹی کورونا وائرس آن زوال کروک آ بندغ آتا کچ 80 اسکان سرمسنے وخت اس کہ کم و ود 3000 بندغ اٹی دا ناجوڑی پک مسنے۔ برطانوی نشریاتی نا رداٹ چینی وزیر جان جوڑی مازیاؤئی دوشنبے نادے آ صحافی تتون گپ و تران کرسا پارے کہ وائرس نا تالانی نا صلاحیت بظاہر طاقتور ءِ۔ کمامدارآک پاریر کہ ہوبائی ٹی زوال کروک آتا کچ 56آن ودسا 76مسنے وخت اس کہ 4بندغ ایلو ہند آتیا زوال کرینو۔ ہوبائی نا شار ووہان اٹی لاک ڈاؤن ءِ پک کننگانے۔ وزیر جان جوڑی تینا بیان اٹی پارینے کہ وائرس ءِ کنٹرول کننگ کن دا بھاز اہم ءُ مرحلہ اسے۔ چین اٹ پک مروک کیس آتا کچ 2744ءِ وخت اس کہ سرکاری میڈیا نا رداٹ 300آن زیات بندغ گڑتی نا حداسکان ناجوڑ ءُ۔ کمامدارآک پڑوکریر کہ ملک اٹی جنگلی ساہدار تا بہاکننگ بندءِ۔ داخیال ظاہر کننگ انگ ءِ کہ دا وائرس ساہدار تیان انسان تے لگانے ولے داوخت اسکان سرکاری وڑاٹ داپک متنے۔ کمامدارآتا کنڈآن چینی پوسکن آ سال انا قومی چھٹی تیٹی 3دے انا ودکی کننگانے تانکہ وائرس ءِ تالان مننگ آن توننگے وخت اس کہ چین اٹ بھاز انگا شار تیٹی سفر آ پابندی خلنگانے۔ کمامدارآتارداٹ کوروناوائرس تینا نشانی تا ظاہر مننگ آن مست تینا رُدنگ اٹ تالان مننگ ءِ و دا سوب آن اودے توننگ مشکل مننگ ءِ۔
