گیس انا فراوانی ٹی اُرائی صارف آک اولیکو اولیت ءُ، گدرینگوک آ دہ سال اٹ تیل و گیس انا پٹنگ نا بشخ آتے ٹی ہچ ءُ پیش رفت اس متنے، بنجائی وزیر توانائی عمر ایوب خان نا ایوان بالا ٹی ورندی

اسلام آباد۔ 24جنوری (اے پی پی) بنجائی وزیر توانائی عمر ایوب خان پارینے کہ ملک ءِ گیس انا کاختی نا مون تروک ءِ، گیس انا ہردے ئی طلب 7.5 ارب مکعب فٹ و پیدوار 3.5 ارب مکعب فٹ ءِ، 1.2 ارب مکعب فٹ ایل این جی درآمد کننگ انگ ءِ، تدوک آ دہ سال اٹی تیل و گیس انا پٹنگ نا بشخ اٹی ہچ ءُ پیش رفت اس متنے، ساڑی حکومت ہشت بلاکس کمپنی تے تسنے، 18 پوسکن آ بلاک آتے ہم نیلام کننگک، ہراکہ صوبہ غان گیس پیش تمے اوڑا مچ آ ملک انا الس نا حق مریک، سندھ انا گیس پیپ لین شاغنگ نا معاملہ غا پیش رفت مفننگ نا سوب آن سدایم ایم سی ایف ڈی گیس ایس این جی پی ایل نا سسٹم اٹ اوارمفننگ ءِ۔ ایوان بالا ٹی جمعہ نادے آ وقفہ سوج آتے ٹی سینیٹر سکندر میندھرو، نعمان وزیر، مشاہداللہ خان و ایلو باسک آتا سوج آتا ورندی ٹی بنجائی وزیر عمر ایوب خان پارے کہ گیس کمپنیک ایس این جی پی ایل و ایس ایس جی سی نا گیس انا فراوانی ٹی اُرائی صارف آک اولیکو اولیت ءُ۔ سندھ انا موقف ءِ کہ گیس آ صوبہ نا اولیکو حق ءِ وخت اس کہ بنجائی حکومت نا موقف ءِ کہ گیس آ مچ آ ملک انا الس نا حق ءِ۔ سوئی سدرن گیس کمپنی پنچ ایم ایم سی ایف ڈی گیس ایس این جی پی ایل وایس این جی پی ایل 248 ایم ایم سی ایف ڈی ایس ایس جی سی ءِ تننگ ءِ۔ اوپارے کہ تیل گیس اتون اوار غٹ معدنیات و کشاری مصنوعات بایدے مچ آ ملک ءِ فراوان کننگے۔ اوپارے کہ پاکستان اٹ گیس انا طلب 7.5ارب مکعب فٹ و پیداوار 3.5ارب مکعب فٹ ءِ وخت اس کہ 1.2 ارب مکعب فٹ ایل این جی درآمد کننگ انگ ءِ۔ اوپارے کہ سندھ اٹی اسہ گیس پیپ لین اس شاغاسن اونا معاملہ غاک طے مفننگ نا سوب آن 100 ایم ایم سی ایف ڈی گیس ایس این جی پی ایل نا سسٹم اٹ اوار کننگ متوس۔ اوپارے کہ پاکستان ءِ گیس انا کاختی نا مون تروک ءِ۔ آئین نا آرٹیکل 158 نا گمان آتا تشریح نا معاملہ سپریم کورٹ اٹی زیر سماعت ءِ۔ اوپارے کہ اوگرا ریگولیٹری اتھارٹی ءِ اوڑاحکومت نا کنٹرول اف۔ قاعدہ نا خلاف وزی آ غاو ملنگ آ کارروائی کننگک۔ اوپارے کہ پاکستان تیل درآمد کروک آ ملک ءِ۔ ریفائنری تا پیدوار ءِ ودفنگ کن گام گیج کننگ اٹی اُن۔ اوگرا تیل انا نہاد آتے متعین کیک۔ حکومت داٹی سبسڈی نا پیسہ غاتے اوار کپک۔ اوپارے کہ تدوک آ اِراسال اٹی تیل وگیس انا بشخ اٹی ہچ ءُ ودکی اس کننگتنے۔ نن ہشت بلاک تسونن۔ 18 پوسکن آ بلاک آتے نیلام کننگک۔ ملکی پیدوار ءِ ودفنگ کن ڈرلنگ نا سرجزآتے ودفنہ۔ اوپارے کہ تیل و گیس انا بشخ اٹی 15ملکی و 35درملکی کمپنی کاریم کننگ ءُ۔ اسہ دُون آ 25آن 30 ملین ڈالر خڑچ مریک۔ غیر جدید ٹیکنالوجی اتنگا و افرادی قوت ءِ تربیت ہم دوئی مریک۔