اسلام آباد۔ 24جنوری (اے پی پی) پاکستان تحریک انصاف نا راہشون سینیٹر فیصل جاوید پارینے کہ ملک آن وڈی خوری ءِ چٹفنگ اٹ وخت لگک، بابائے قوم قائد اعظم محمد علی جناح ہم پاریسس کہ مچ آ دنیا ٹی وڈی خوری ءِ ولے برصغیر اٹ گڑاس زیات ءِ، وزیراعظم عمران خان ملک اٹ نت انا تینا خود آن کاختی نا نوٹس ءِ ہلک۔ جمعہ نادے آ پارلیمنٹ ہاؤس نا پیشن میڈیا تون گپ و تران کرسا اوپارے کہ ملک اٹ وڈی خوری نا ودنگ نا تاثر راست اف۔ وزیراعظم عمران خان نا دورحکومت اٹ وڈی خوری کم مسنے۔ خلقت ءِ وڈی خوری نا سماالوکہ داسہ سماتمانے۔ تحریک انصاف نا حکومت تون جادو نا چھڑی اس اف کہ اسہ نن اٹ سی سال انا وڈی خوری ءِ چٹفنگ مفک۔ داڑکن وخت درکار ءِ۔ اوپارے کہ قائد اعظم 1947 ء نا تینا تران اٹ پاریسس کہ مچ آ دنیا ٹی وڈی خوری ءِ ولے برصغر اٹ گڑاس زیات ارے۔ ملک آن وڈی خوری نا چٹفنگ کن ننے غٹ ءِ اواری اٹ کڑد ادا کروئی مریک۔ سینیٹر فیصل جاوید پارے کہ بے نظیر انکم سپورٹ پروگرام آن ہشت لکھ آن زیات خلقت ءِ کشنگانے ہرا نیزگار خلقت نا وظیفہ غاتے ہلکرہ وخت اس کہ داپروگرام آن سرکاری ملازم آک ہم وظیفہ ہلکرہ ہرافتا برخلاف انکوائری کننگ انگ ءِ و اوفتیان ہلوک آ وظیفہ نا ریکوریءِ کننگک۔ اوپارے کہ ملک اٹ نت انا تینا خود آن کاختی ودی کروک آتا برخلاف وزیراعظم نوٹس ہلکونے۔ ہنداوڑ تیناخود آن کبینی کروک آتا برخلاف ہم سخت ایکشن ہلنگک۔ اسہ سوج اسے نا ورندی ٹی او پارے کہ پارٹی نا تہہ ٹی اختلاف آتا خبر آتے ٹی ہچ ءُ راستکی اس اف، دا شخصی، جندی سلاہ، ہربابت آن مننگ کیرہ ولے او پارٹی تون سلوک ءِ۔
