کوءٹہ ۔ 23جنوری (اے پی پی) وزیراعلیٰ بلوچستان جام کمال خان نا کماشی ٹی اڈ ہلوک آ اسہ بڑزکو کہولی دیوان اٹی گوادر ڈویلپمنٹ اتھارٹی نا امور و تعلیم و جان جوڑی نا جاری ڈٹ آتا پیش رفت نا جاچ ءِ ہلنگا، ڈائریکٹر جنرل جی ڈی اے شاہ زیب کاکڑ دیوان ءِ حوال تس ۔ صوبائی وزیر ظہور احمد بلیدی، وزیراعلیٰ نا کوارڈنیٹر عبدالرءوف رند، ایڈیشنل چیف سیکرٹری ڈٹ بندی و شونداری عبدالرحمان بزدار، سیکرٹری مواصلات ، سیکرٹری جان جوڑی ، کمشنر مکران ڈویژن و ڈپٹی کمشنر گوادر آن بیدس ایلو تعلقدار کمامدارآک دیوا ن اٹی ساڑی ئسر ۔ دیوان ءِ پاننگاکہ گوادر اولڈ سٹی نا ٹاءون پلاننگ، نکاسی آب ، روڈ آتا پکا کننگ ودیر انا فراوانی نا ڈٹ آتیا کاریم برجاءِ، مسہ ارب 80 کروڑ روپئی نا خڑچ آن سورڈیم آن گوادر اسکان دیر انا پیپ لین خلنگ آن پد ڈیم آن گوادر ءِ دیر انا فراوانی نا بناءِ کننگانے ۔ گوادر نا غٹ چنکا بھلا اسکیم تے روڈ نیٹ ورک اتون گنڈنگ انگ ءِ و گوادر اٹی 90 منزل اسکان ہائی رائز ماڑی تفنگ مریک، دیوان ءِ پاننگاکہ گوادر اٹ دہ کروڑ روپئی نا خڑچ آن ٹراما سینٹر و پانزدہ کروڑ روپئی نا خڑچ آن ڈی ایچ کیو ہسپتال نا پوسکن آ ماڑی نا تفنگ نا کاریم نا بناءِ کننگ انگ ءِ ، گوادر اٹ فٹ بال گراءونڈ نا تفنگ آن بیدس سپورٹس کمپلیکس اس ہم جوڑ کننگک وخت اس کہ کوہ باطل پرسنسٹ پوائنٹ پارک اینخو سال اٹی پورو کننگک، دیوان ءِ پاننگا کہ نیوٹاءون ہاءوسنگ اسکیم اٹ پارک انا جوڑ کننگ و سٹریٹ لاءٹس آتا تنصیب نا کاریم ہم برجاءِ، دیوان اٹی گوادر ماسٹر پلان نا منظوری نا رداٹ جی ڈی اے نا بائی لاز انا ہم جاچ ءِ ہلنگا ہرانا منظوری آن پد تعمیرات کن این او سی نا جاری کننگ نا بناءِ کننگک ۔ دیوان آن تران کرسا وزیراعلیٰ پارے کہ گوادر داسہ عملی شون ہلنگ ءِ و دانا شمار زوت دنیا نا شون ہلوک آ شارتیٹی مریک ، گوادر نا شونداری سوگو حکمت عملی نار داٹ برجاءِ، وزیراعلیٰ پارت کرے کہ گوادر واٹر ٹریٹمنٹ پلانٹ نا دیر پارک، کارواش و تعمیراتی کاریم تے کن واپاری وڑاٹ کاریم اٹ اتنگے و دوئی مروک آ کٹیا تے پلانٹ ءِ چلیفنگ آ خڑچ کننگے ۔ اوشونداری ڈٹ آتا وخت آ پوروی و آب ءِ پک کننگ نا پارت کرے ، وزیراعلیٰ گوادر اٹ جان جوڑی و تعلیم نا محکمہ غاتے ٹی خورک آسامی تیا اہلیت نا رداٹ بھرتی نا پارت ہم کرے ۔
