کوءٹہ ۔ 23 جنوری (اے پی پی) وزیراعظم پاکستان نا خصوصی کمکار حوالکاری وشین کاری ڈاکٹر فردوس عاشق اعوان پارینے کہ وزیراعظم پاکستان عمران خان نا ویژن بلوچستان ءِ شونداری تننگ ناءِ، بلوچستان پاکستان نا اہم ءُ بشخ اسے ہرادے گوجالنگ مفک، چیلنج آک بھلن ءُ ولے ننے پی ٹی وی ءِ بی بی سی نا وڑاٹ متحرک کروئی ءِ، پاکستان ٹیلی ویژن ءِ ہم دنیا نا میڈیا ہاءوس آتون گنڈنہ، کارندہ و آرٹسٹ آک میرات ءُ، داخیال آتا درشانی ءِ او پنچ شنبے نادے آ پی ٹی وی بولان نا لائیو پروگرام اٹی خصوصی گپ و تران کرسا کرے، اووزیراعظم عمران خان نا پارت آ بلوچستان نا دورہ ءِ کرے و برف و پِر آن ودی مروک آ حالیت آتا جاچ ءِ ہلک ۔ خصوصی کمکار حوالکاری و شین کاری ڈاکٹر فردوس عاشق اعوان پارے کہ وزیراعظم نا ویژن ءِ کہ ننے بلوچستان ءِ شون تننگ نا ءِ، بلوچستان پاکستان نا اہم ءُ بشخ اسے ہرادے گوجالنگ مفک ، بلوچستان نا ویل آتا ایسر اولیت ءِ ، اوپارے کہ نن ویل آتون بلوچستان نا وسیلہ غاتے ہم دنیا نا مون آ اتنگ خوانہ تانکہ انٹرنیشنل کمپنیک بلوچستان اٹی زرکاری کیر و لس بندغ کن روزگار نا وارخواہی ودی مرے ۔ خصوصی کمکار پارے کہ صوبہ نا شونداری کن بنجا صوبائی حکومت و سیوتی جماعت آک اسہ پنہ غاٹو ننے اجتماعی حکمت عملی اسے تون اواری اٹ ویل آتا ایسر و شونداری کن جہد کروئی مریک ۔ حوالکاری و شین کاری ماسٹر کنٹرول روم آن لائیو نشریات آتا ہم جاچءِ ہلک، اوادارہ نا چندی بشخ آتا ہم دورہ ءِ کرے ۔ پی ٹی وی کوءٹہ مرکز نا دورہ ٹی ڈاکٹر فردوس عاشق اعوان سی بی اے یونین نا عہدیدار آتون ہم اوڑدہی کرے ۔ جنرل منیجر پی ٹی وی کوءٹہ سینٹر ایوب بابئی ادارہ نا کارکڑد انا بابت خصوصی کمکار ءِ بریف کرے ۔ خصوصی کمکار ڈاکٹر فردوس عاشق اعوان پی ٹی وی کوءٹہ مرکز آ سرمس تو جنرل منیجر پی ٹی وی کوءٹہ ایوب بابئی و کارندہ غاک خصوصی کمکار ءِ پبی بخیر کریر ۔ داکان مست ڈاکٹر فردوس عاشق اعوان ریڈیو پاکستان نا ہم دورہ ءِ کرے ۔ اسٹیشن ڈائریکٹر بی بی سی سہیل جعفر ادارہ نا ویل و کسبی سرجز آتیان خصوصی کمکار ءِ آگاہ کرے ۔ ڈاکٹر فردوس عاشق اعوان ریڈیو اسٹیشن نا چندی بشخ آتا ہم دورہ ءِ کرے ۔
