ڈیووس ۔ 23جنوری (اے پی پی) وزیراعظم عمران خان پارینے کہ یک و نیم سال نن بھاز مشکل آتون مون تسن، شونداری کن کشتی تے ہشوئی تمک، ننا حکومت کن بھلا چیلنج مستین نا حکومت آتا کنڈآن ہلوک آ وام تا انبار و گردشی وامک ئسر، حکومتی گام گیج آتیان زرگزران گچین مننگ ءِ، اسٹاک مارکیٹ اٹی گچینی بننگ ءِ، درملکی زرکاری ٹی ودکی مسنے ، ننا سمت سہی ءِ، پاکستان کن جوان ءُ وخت اس بناکننگ والا ءِ ۔ داخیال آتا درشانی ءِ او پنچ شنبے نادے آ داڑے پاکستان بریک فاسٹ میٹ اٹی اہم کاروباری شخصیت آتون گپ و تران کرسا کرے ۔ دو د انا مسخت کاروباری شخصیت آتے پاکستان اٹی زرکاری نا چاگرڈ آن معلومدار کننگ ءِ ۔ مچ آ دنیا نا اہم کاروباری شخصیت آک جہانی اقتصادی فورم اٹی شریک ءُ ۔ وزیراعظم عمران خان پارے کہ ڈیووس اٹی اڈکننگ بھاز کبین ءِ، ای حکومت نا داڑا خڑچ کننگ خواتوٹہ ۔ ڈیووس اٹی کنا اڈکننگ نا خڑچ آتے اکرام سہگل و محمد عمران ئسک برداشت کریر ۔ ڈیووس آ بروک آ وزیراعظم آتیان غٹ آن اڑزان دورہ کنا مریک ۔ وزیراعظم عمران خان تینا جہد ءِ مون آ تخسا ساڑی مروک آتے پارے کہ ہراتم ای کرکٹ نا بناءِ کریٹ تواولیکو ٹیسٹ میچ اٹی کنے ڈراپ کننگاسس ۔ زند اٹی مون آ ہِننگ کن نمے مشکل حالیت آتے ٹی کٹنگ نا سلیقہ بایدے برے ۔ اوپارے کہ نیزگار و راج انا شیفکو تپہ نا بندغ آتے مون آ ہِننگ نا بھاز لاءخی مریک ۔ ای تینا ملک انا بے کچ پسماندہ علاقہ غاتے ٹی یونیورسٹی جوڑ کریٹ ۔ میانوالی نا نمل یونیورسٹی ٹی طالب علم آتے بریڈ فوڈ یونیورسٹی آن ڈگری جاری مریک ۔ نمل یونیورسٹی ٹی خوانوک آ نیزگار طالب علم آتے ٹی بھاز لاءخی خناٹ ۔ اوپارے کہ ہراتم کنا لمہ کینسر اٹ اختہ مس تو معلوم مس کہ پاکستان اٹی کینسر ہسپتال اف ۔ لمہ نا تکلیف ءِ خناٹ ارادہ کریٹ کہ پاکستان اٹی نیزگار مریض آتے کن کینسر نا ہسپتال اس جوڑ کیوہ ۔ شوکت خانم کینسر ہسپتال اٹی 75 درسد مریض آتا درمان ءِ مفت کننگ انگ ءِ ۔ شوکت خانم کینسر ہسپتال آ 10 ارب سالانہ خڑچ بریک ۔ اوپارے کہ دوپارٹی نظام آن بیدس مسٹ میکو پارٹی نا ہچ ءُ گنجائش اس الوکہ ہراوڑ انگلینڈ و امریکہ ٹی نن خنانن ۔ بھلا ہدف آتے ہلنگ کن نمے کشتی تے ہشوئی تمک ۔ اوپارے کہ پاکستان اٹی شونداری کننگ نا بھاز لاءخی ارے ۔ 60 ء نا دہائی ٹی پاکستان دنیا نا چندی ملک آتے کن اسہ مثال اس ئس ۔ قوم اٹ اومیت ئس ولے ولدا ہندن ءُ دور اس بس ہراتم اقتدار نا میوزیکل چیئر نا گوازی چلینگسا کرے و پاکستان ءِ جوڑ کننگ نا مسخت آن نن مون ہڑسنگ ءِ اختیار کرین ۔ اوپارے کہ پاکستان اسہ نظریہ سے نارداٹ جوڑ مس ۔ نن بایدے اودے فراموش کپن ۔ قائد اعظم پاکستان ءِ اسلامی فلاحی ریاست اس جوڑ کننگ خواسکہ ۔ وزیراعظم پارے کہ پاکستان بے پناہ وسیلہ و لاءخی تیان شپ ءِ ۔ بلوچستان اٹی ریکوڈک نا ہند آ خیسن و پتل نا 14کانڑ ءُ ۔ بیرہ 2کانڑ تا کٹیا 100 ارب ڈالر آن زیاتءِ ۔ پاکستان اٹی گیس، کولانا بھلو کوڑی اس ارے ۔ کنا وژن پاکستان ءِ حقی وڑاٹ فلاحی ریاست اس جوڑ کروئی ءِ ۔ حکومت صنعت آتا شونداری کن کاریم کننگ ءِ ۔ اوپارے کہ زرکاری کن ملک اٹی آسانی ودی کننگ نا گام گیج کننگانے ۔ اوپارے کہ مہاتیر محمد بھاز خواری اٹ ملائیشیا ءِ شون ہلوک ملک آتا کسر آ روان کرے ۔ پاکستان ءِ ہم ہنداوڑانگا چیلنج آتا مون تروک ئس ۔ پاکستان اٹی ننا حکومت کرپٹ عنصر آتا محاسبہ ءِ کرے ہرافتیان گڑاس داسہ جیل اٹی ءُ ۔ اوپارے کہ ننا حکومت ءِ اقتدار اٹ بننگ آن پد ریاستی ادارہ غاتا خراب حالیت آتا مون تروک ئس ۔ اسہ پین چیلنج اس مسکوہی حکومت نا کنڈآن ہلوک آ وام تا انبار ئس ۔ ننا کٹیا نا بھلا بشخ وام تیا سود انا زرتس آ خڑچ مریک ۔ زیر گردش وام تا کچ ارب آ روپئی اسکان ودانے ۔ اگہ کنا مشکل حالیت آتے ٹی مون آ ہِننگ نا تجربہ متوکہ تو کنے آن ہم حوصلہ ہناکہ ۔ اوپارے کہ فرسودہ نظام اٹی اصلاحات اتنگ آسان مفک ۔ نن حکومت نا اولیکو سال جاری حساب آتا نسخان اٹی 75 درسد کمتی کرین ۔ اوپارے کہ پاکستان ءِ فلاحی ریاست اس جوڑ کننگ کنا وژن ءِ ۔
