اسلام آباد ۔ 22 جنوری (اے پی پی)مزن وزیر ءِ ھاسیں کمکار برائے سماجی تحفظ ءُُ غربت مٹاوَ ڈاکٹر ثانیہ نشتر ءَ گوشت کہ احساس پروگرام ءِ ھاترا پرائیویٹ سیکٹر ءِ عطیات ھرچ کنگ ءِ ھاترا ملک ءِ تہ ساپ ءُُ پلگاریں سسٹم آوکیں سئے ماہ ءِ تہ نافذ کنگ بیت ۔ اے ھیالانی درشان آہاں شار شمبے ءَ نیشنل فورم فار انوائرمنٹ اینڈ ہیلتھ ءِ چیر دستی 12می سالینہ سی ایس آر کانفرنس ءِ بنداتی سیشن ءَ گوں تران کنان ءَ کتگ ۔ آہاں گوشت کہ ملک ءِ تہ ساڑی جندی سیکٹر ءُُ بیءپاری ادارگہاں گون سیادی داروکیں مخیر مردم حکومت ءِ احساس پروگرام ءِ ھاترا عطیات دیگ لوٹگ انت بلے آہانی اے ھوالہ چہ آہانی اے ھیال انت کہ آوکیں سئے ماہ انتظار کنگ بہ بیت کہ حکومت اے رنگیں سسٹم بیارایت تنکہ ایشانی عطیات ءِ شریں وڈ ءَ کارمرزی ءِ ھاترا ساپ ءُُ پلگاریں سسٹم ءِ ساڑی بہ بیت ۔ آہاں گوشت کہ استیں حکومت ءِ نیمگا چہ یک مچ ءِ پالیسی جوڈ کنگ بہ بیت تنکہ بیءپاری ادارگہاں را فلاحی کارانی ھوالہ چہ یک ترغیب ءَ گوں ھوار پیکج آئی ءِ دلبڈی ءِ ھاترا پھجارگ بہ بیت ۔ آہاں گوشت کہ احساس پروگرام ءِ 130لہتیں اجزاء انت تنکہ ملک ءِ تہ ساڑی پسماندہ ءُُ غیر مراعات یافتہ تبکانی لہتیں گروپانی ریاست ءِ نیمگا چہ چکاریں کمک کنگ بہ بیت ۔ آہاں گوشت کہ آہانی چکاریں کوشست انت کہ احساس پروگرام ءِ لہتیں جزئیات ءِ ھاترا ہمگرنچیں پرائیویٹ سیکٹر ءِ گوما بھرپور شراکت داری ءِ نظام ہڈ دیگ بیت ۔ آہاں گوشت کہ استیں حکومت ءَ را احساس انت کہ ایوکا ریاست ملک ءِ پسماندگی ءُُ غیرمراعات یافتہ تبکانی کمک نہ کرت کن ایت ءُُ اے مکسد ءِ ھاترا ایشی ءَ را پرائیویٹ سیکٹر ءِ کمک ءِ سک ضلورت انت ۔
