کوءٹہ ۔ 22جنوری (اے پی پی) وزیراعلیٰ بلوچستان جام کمال خان پارینے کہ بلوچستان رقبہ نا لحاظ اٹ پاکستان نا غٹ آن بھلا صوبہ ءِ ہرا 44درسدآن زیات رقبہ غا تالان ءِ، صوبہ نا زیات تر آبادی دیہی علاقہ غاتے ٹی رہینگرہ ، صوبائی حکومت دیہی علاقہ غاتا شونداری کن کاریم کننگ ءِ، بلدیاتی ادارہ غاتے مالی و انتظامی وڑاٹ واکدار کننگ کن لوکل گورنمنٹ ایکٹ اٹ ترمیم آتا ذریعہ واکداری تے شیفکو کہول اسکان گدریفنگک تانکہ الس نا ویل آک اوفتا درگہ غا ایسر مننگ کیر ۔ داخیال آتا درشانی ءِ او وزیراعلیٰ پنجاب سردار محمد عثمان بزدار نا شرف اٹ اڈ ہلوک آ دود آن تران کرسا کرے ۔ وزیراعلیٰ بلوچستان پارے کہ او وزیراعلیٰ پنجاب ءِ ضلع کیچ انا شار تربت نا دورہ ءِ کننگ آ بخیر اٹ پاہک و ننے خوشی ءِ کہ اینو دا متکن آ تاریخی شاراٹی وزیراعلیٰ پنجاب ننا نیام اٹ ساڑی ءِ، اوپارے کہ وزیراعلیٰ پنجاب نا دا دورہ غان صوبائی ہم گرنچی و صوبہ غاتا نیام اٹ رابطہ غاتے پین مون آ دننگ رسینگک و ہڑتوم آ صوبہ غاتا الس نا نیام اٹ برادرانہ تعلقداری تیٹی ودکی مریک، صوبائی حکومت نا شونداری گام گیج و پالیسی تے مون آ تخسا وزیراعلیٰ پارے کہ صوبائی کابینہ نا فیصلہ نا روشنی ٹی جان جوڑی، تعلیم و ایلو محکمہ غاتے ہم مرحلہ وار ڈویژنل و ضلعی کہول آ فعال کننگک ہرافتا اختیار آک شیفکو کہول اسکان گدریفنگرہ، وزیراعلیٰ پارے کہ ضلع کیچ نا الس باشعور و خوانوک ءُ، بلوچستان نا جوڑ جاڑ و شونداری ٹی مکران نا خلقت نا بنداوی ءُ کڑد اسے، دود آن تران کرسا صوبائی وزیر میر ظہور احمد بلیدی وزیراعلیٰ پنجاب ءِ بخیر اٹ پارسا پارے کہ اونا دورہ مکران نا خلقت کن باعث عزت و اعزازا سے ، اوپارے کہ مکران ڈویژن ءِ بلوچستان اٹی اسہ خاص ءُ ہند اس دوئی ءِ، داجاگہ نا گل زمین عطاء شاد وسید ظہور شاہ ہاشمی کون ءُ شاعر و ادیب ودی کرے، اوپارے کہ وزیراعلیٰ جام کمال نا کماشی ٹی صوبائی حکومت صوبہ نا ایلو علاقہ غاتیانبار مکران نا شونداری ٹی ہم پبی کڑد ادا کننگ ءِ ، داڑے یونیورسٹی، میڈیکل ، انجینئرنگ ولاء کالج آن بیدس سپورٹس کمپلیکس نا ڈٹ آتیا کاریم برجاءِ، داکان مست کمشنر مکران ڈویژن طارق قمر بلوچ وزیراعلیٰ پنجاب نا شرف اٹ سپاسنامہ اس پیش کرسا اودے مکران ڈویژن نا بارواٹ سرجم حوال تس، سرکٹ ہاءوس آ سرمننگ آ ہڑتوم آ وزیراعلیٰ تے لیویز نا چاک و چوبند دستہ سلامی پیش کرے وخت اس کہ تربت آ بننگ آ وزیراعلیٰ پنجاب نا علاقہ نا سرکڑدہ و الس نا کنڈآن والہانہ بخیر کننگا ۔ وزیراعلیٰ بلوچستان وزیراعلیٰ پنجاب ءِ روایتی دستار آ بینیفے، اوکان پد وزیراعلیٰ پنجاب نا شرف اٹ پرتکلف اِرغ اس تننگا، ہڑتوم آ وزیراعلیٰ بذریعہ ہیلی کاپٹر میرانی ڈیم و پِر تیان زہمی علاقہ غاتا فضائی جاچ ءِ ہلکر، وزیراعلیٰ پنجاب بر ف و پِر تیان زہمی علاقہ غاتا الس نا امداد و بحالی کن پنجاب حکومت نا کنڈان پبی کمکاری نا باوری کرفے ۔ تربت نا دورہ ءِ پورو کرسا ہڑتوم آ وزیراعلاک گوادر آ روانہ مسر ۔
