کوءٹہ ۔ 22جنوری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان نا است بلوچستان تون دھڑکک انتئے کہ بلوچستان نا شونداری دراصل پاکستان نا شونداری ءِ، وزیراعظم عمران خان نا پارت آ بلوچستان نا موسم آن زہمی مروک آ علاقہ غاتا خلقت نا دادرسی کن کوءٹہ غا بسونٹ، صدر ٹرمپ نا کشمیر نا ویل آ وار وار ثالثی ناپیش کش ءِ دہراءفنگ پاکستان نا سرسہب سفارت کاری نا کنڈا اہم ءُ پیش رفت اسے ، و گچین خارجہ پالیسی نا سوب دنیا دا حقیقت آن معلومدار مسنے کہ کشمیر نا ویل ایسر نا چاری و متنازع ویل اسے و جہانی محاذ آ دادے ایسر کننگ کن ڈائیلاگ آن بیدس ہچ ءُ کسر اس اف ۔ داخیال آتا درشانی ءِ او پنچ شنبے نادے آ کوءٹہ بالی پٹ آ صحافی تتون گپ و تران کرسا کرے ۔ داوخت آ ڈپٹی اسپیکر بلوچستان اسمبلی سردار بابر خان موسیٰ خیل، پاکستان تحریک انصاف نا باسک بلوچستان اسمبلی مبین خان خلجی ، ترجمان حکومت بلوچستان لیاقت شاہوانی و پاکستان تحریک انصاف نا راہشونک سردار خان رند، آصف ترین، سردار خادم حسین وردگ، ادریس بڑیچ، ملک عادل خان بازئی و ایلوفک ہم ساڑی ئسر ۔ وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان پارے کہ وزیراعظم نا است بلوچستان نا الس تون دھڑکک ہرامدام بلوچستان ءِ اسہ قدرتی وسیلہ غاتیان شپ صوبہ اس تکسا اودے کلیدی پارٹنر و تینا وجود نا اہم ءُ بشخ اسے نا وڑات سمجھک ہنداخاطران وزیراعظم عمران خان بلوچستان نا شونداری ءِ مدام پاکستان نا شونداری تون گنڈک انتئے کہ داٹی ہچ ءُ شک اس اف کہ بلوچستان نا شونداری دراصل پاکستان نا ہی شونداری ءِ ، خصوصی کمکار حوالکاری و شین کاری ڈاکٹر فردوس عاشق اعوان پارے کہ بلوچستان اٹی ساڑی آ برف و پِر تیان ہرا نہادی جانک زیان مسر و ننا بے شمار ایڑھ و چناک ٹھپی مسنو، بنجائی حکومت صوبہ نا کم وسیلہ غاتا سوب آن وخت آریلیف دستیاب مفننگ آ این ڈی ایم اے ءِ متحرک کرے و این ڈی ایم اے نا وخت آ کارروائی تیان کیہی انسانی جان تے بچفنگ و ٹھپی تے وخت آ طبی امداد فراوان کننگ کن این ڈی ایم اے صوبائی حکومت تون اواری اٹ تینا گچین کڑد ءِ ادا کرے ۔ دا چرجوئی ٹی ای اینو وزیراعظم عمران خان نا پارت آ چیئرمین این ڈی ایم اے ہرا پیکج نا پڑو ءِ کریسس اودے صوبائی حکومت تون اواری اٹ عملدرآمد نا بابت حتمی دروشم اس تننگ کن سلابت کننگک و برف و پِر تیان مروک آ نسخان آتون ٹھپی و اُراتا تمنگ نا نسخان آتون بھس مروک آ انفراسٹرکچر نا بحالی کن این ڈی ایم اے و بنجائی حکوت نا کڑد ءِ مون آ ودفنگ تون صوبائی حکومت نا ایلو گرج آتا احاطہ ءِ کینہ چونکہ بحیثیت خصوصی کمکار وزیراعظم حوالکاری و شین کاری نا زمواری ءِ سنبھالنگ آن پد اولیکو وار کوءٹہ غا بسونٹ ہنداخاطران داجاگہ نا ہندی میڈیا نا ویل آتے بِننگ کن میڈیا ورکرز آتون کوءٹہ پریس کلب اٹ سرجم سیشن اس مریک، اوپارے کہ بلوچستان نا الس کن اسہ ہی کلہو اس ایسونٹ بسونٹ کہ وزیراعظم عمران خان ڈیووس اٹی ءِ و ہموڑے امریکی صدر ڈونلڈ ٹرمپ اتون مروک آ اوڑدہی ٹی اسہ وار ولدا صدر ٹرمپ انا پاکستان و ہندوستان نا نیام اٹ ثالثی نا کڑد ءِ ادا کننگ کن تینے پیش کننگ دا ہیت انا غمازی و اشارہ ءِ کیک کہ کشمیر نا ویل انا بابت وزیراعظم پاکستان عمران خان کشمیر نا ویل انا بابت دنیا ءِ ہراوڑ بش کرینے اوفتا ضمیر ءِ سرفینے و صدر ٹرمپ انا وار وار ثالثی نا پیش کش ءِ دہراءفنگ سرسہب سفارت کاری نا کنڈا اہم ءُ پیش رفت اسے و دا داہیت انا ہم پیدوار ی ءِ کیک کہ دنیا دا حقیقت آن آگاہ مسنے ۔
