کوءٹہ ۔ 22 جنوری (اے پی پی) چیف سیکرٹری بلوچستان فضیل اصغر ڈائریکٹر جنرل قومی احتساب بیورو بلوچستان فرمان اللہ خان اتون نیب آفس اٹی اوڑدہی کرے ، اوڑدہی ٹی وڈی خوری نا چندی کیس آتے ٹی نیب بلوچستان نا کنڈآن ریکور کروک آ جائیداد آتا صوبائی حکومت ءِ حوالگی، چندی سرکاری محکمہ غاتے ٹی ممکنہ کرپشن ءِ توننگ کن اصلاحاتی کمیٹی تا سلاہ، نیب کیس آتے ٹی سزا کنوک صوبائی سرکاری آفیسر و کارندہ غاتا اہم پوسٹ آتیا تعیناتی تون اوار چندی باندات آتیا گپ و تران کننگا ۔ چیف سیکرٹری بلوچستان فضیل اصغر ڈائریکٹر جنرل نیب بلوچستان فرمان اللہ خان تون داوخت آ نیب انا کرپشن نا توننگ کن کروک آ کوشست آتا ستاءِ کرسا پارے کہ ساڑی حکومت کرپشن نا چٹفنگ کن سنجیدہ ءِ، نیب انا تین پہ تینی کمکاری اٹ بدعنوانی نا عفریت ءِ ماس کش کننگ مریک ۔ اوپارے کہ السی ویل آتا ایسر، وڈی خوری نا توننگ و میرٹ ءِ مون آ دننگ کن نیک نیتی اٹ گام گیج کننگ انگءِ ، او ڈی جی نیب بلوچستان نا کنڈآن کرپشن نا توننگ کن پیش کروک آ سلاہ تا ستاءِ کرسا پارے کہ کرپشن ءِ وقوع پذیر مننگ آن مست توننگ کن چست کروک آ گام گیج بے کچ المی ءِ ۔ اواومیت ظاہر کرے ، نیب انا کمک اٹ صوبہ ٹی کرپشن نا چٹفنگ و جم حالیت آتے ٹی گچینی بریک ۔ اوپارے کہ نیب انا کنڈآن تروک آ سلاہ آ عملدرآمد ءِ پک کننگک ۔ داکان مست ڈی جی نیب بلوچستان چیف سیکرٹری ءِ نیب انا این اے او 1999نا رداٹ کاریم کننگ نا وڑوڈول و کرپشن نا برخلاف سرسہبی تیان معلومدار کرے ۔ ڈی جی نیب پارے کہ قومی احتساب بیورو چیئرمین نیب جسٹس جاوید اقبال نا وژن ءِ مون آ تخسا ملک آن کرپشن نا پورو چٹفنگ کن تینا قومی زمواری تے است انا حب اٹ پورو کننگ ءِ ۔ کرپشن نا برخلاف سہ جہتی حکمت عملی نا رداٹ سکولز، کالجز، یونیورسٹی تتون اوار چندی مکاتب فکر اتون فکری شعور و آگہی نا پروگرام اڈتننگ انگ ءِ ۔ محکمانہ رولز، ریگولیشن اٹی کرپشن نا کسر ءِ توننگ و سرکاری خزانہ نا دُزی ءِ چٹفنگ کن رولز اینڈ ریگولیشن اٹ گچینی و اصلاحات آ کاریم برجاءِ ۔ اوصوبائی محکمہ غاتا آفیسر و ملازم آتا برخلاف کرپشن کیس آتا جاست وپاست اٹی ریکور کروک آ جائیداد ، چندی محکمہ غاتے ٹی کرپشن نا چٹفنگ کن سلاہ تیا ہم سیر اٹ گپ و تران کریر ۔
