اسلام آباد ۔ 22جنوری (اے پی پی) محکمہ موسمیات نا رداٹ بروک آ 24گھنٹہ ٹی ملک انا گیشتر علاقہ غاتے ٹی موسم یخ و پِرکپک ولے گلگت بلتستان ، کشمیر و اونا ایب وکیب انا مشی آ علاقہ غاتے ٹی گڑاس ہند آتیا پڑی پڑی پِر و مش تیا برف انا گمان ءِ ۔ پنجاب نا گڑاس میدانی علاقہ غاتے ٹی سہب انا وخت آ زرس گوتلو تمنگ نا گمان ءِ ۔ رپورٹ نا رداٹ تدوک آ 24گھنٹہ ٹی بڑزکو خیبر پختونخوا ، مری ، اٹک ، اسلام آباد، کشمیر، گلگت بلتستان نا ضلع غاتے ٹی گڑاس ہند آتیا پِر مس ۔ داوخت آ مالم جبہ، مری، پاراچنار، کالام و استور اٹی برف ہم ریکارڈ کننگا ولے ملک انا ایلو علاقہ غاتے ٹی موسم یخ و پر کتو ۔ تدوک آ 24گھنٹہ ٹی پٹن اٹی 17، لی میٹر، بالا کوٹ 11، پاراچنار 10، دیر 7 ، کاکول 6، کالام 4، سیدوشریف ، دروش 2، مظفر آباد 11، گڑھی دوپٹہ 6، راولا کوٹ 5، کوٹلی اسٹ، مری 10، اٹک2، اسلام آباد ، اسکردو و باگروٹ اٹی اسہ ملی میٹر پِر وخت اس کہ مالم جبہ ٹی 5انچ، مری 4، پاراچنار 3، کالام و استور اٹی اسہ انچ برف ریکارڈ کننگانے ۔ چارشنبے نادے آ ریکارڈ کروک آ کم آن کم درجہ حرات نا رپورٹ نا رداٹ اسکردو ٹی درجہ حرارت منفی 15، بگروٹ، گوپس منفی 12، پاراچنار منفی 9، استور منفی 8، مالم جبہ منفی 7، قلات ، کالام منفی 6و مری منفی 4 ڈگری سینٹی گریڈ ریکارڈ کننگانے ۔
