اسلام آباد ۔ 22جنوری (اے پی پی) وزیر خارجہ مخدوم شاہ محمود قریشی وزیراعظم عمران خان نا دورہ ڈیووس نا بابت اہم ءُ بیان اسے ٹی پارینے کہ ٹرمپ باوری کرفینے کہ او زوت پاکستان نا دورہ ءِ کیک، صدر ٹرمپ اتون اوڑدہی جوان ءُ اوڑدہی اس ئس ہراٹی وزیراعظم عمران خان کشمیر و اوغانستان نا حالیت آتون اوار اہم باندات آتے ہرفے ۔ وزیر خارجہ پارے کہ اسہ گھنٹہ اسکان برجاسلوک آ دا اوڑدہی ٹی او ہم ساڑی ئس ۔ چارشنبے نادے آ تینا اسہ بیان اسے ٹی اوپارے کہ پاکستان ایف اے ٹی ایف نا باندات ءِ ہرفے ۔ وزیراعظم عمران خان صدر ٹرمپ اتون ایف اے ٹی ایف آ سپورٹ نا پارے ۔ وزیراعظم عمران خان پاکستان نا کنڈآن ایف اے ٹی ایف نا بابت کروک آ گام گیج آتا بابت پارے ۔ وزیراعظم صدر ٹرمپ ءِ ٹریول ایڈوائزری ٹی گچینی نا پارے ۔ وزیراعظم عمران خان واپار نا بابت ہم ہیت کرے ۔ اوڑدہی ٹی فیصلہ مس کہ امریکہ نا اسہ واپاری ءُ ڈل اس پاکستان آ بریک ۔ وزیراعظم کشمیر نا حالیت آتاخاکہ اس صدر ٹرمپ انا مون آ تخا ۔ صدر ٹرمپ پارے کہ کشمیر نا حالیت آتیا گڑتی ءِ ۔ اوپارے کہ صدر ٹرمپ باوری کرفینے کہ او کشمیر نا ویل آ ہیت کیک ۔ صدر ٹرمپ پارے کہ کشمیرناویل بایدے ایسر مرے ۔ صدر ٹرمپ پارے کہ ای عمران خان ءِ پسند کیوہ ۔ صدر ٹرمپ پارے کہ ای عمران خان آ پت کیوہ ۔ صدر ٹرمپ ءِ ایران نا باندات آ گڑتی آن معلومدار کرے ۔ صدر ٹرمپ اتون اوغانستان نا ویل آ ہم ہیت مس ۔ اوغانستان اٹی امن نا عمل ءِ ہم مون آ دننگ آ ہیت مس ۔ ایران نا ویل آن ہرامضر اثرآک پاکستان آ تمرہ صدر ٹرمپ اتون اوفتیا ہم ہیت مس صدر ٹرمپ اتون بھاز جوان ءُ چاگڑد اسے ٹی اوڑدہی مس ۔ صدرٹرمپ نا مچ آ ٹیم ساڑی ئس ۔
