ڈیووس ۔ 22جنوری (اے پی پی) پاکستان و آذربائیجان غٹ بشخ آتے ٹی ہڑتوم آ کنڈآتا تعلقداری تے پین سوگو کننگ نا عزم انا درشانی ءِ کرسا اسہ ایلو نا قومی باندات آتیا تین پہ تینی مخ تفی نا درشانی ءِ کریر ۔ وزیراعظم عمران خان تون آذربائیجان نا صدر الہام علیوف ڈیووس اٹی جہانی اقتصادی فورم نا سالانہ دیوان 2020ء نا وخت آ اوڑدہی کرے و ہڑتوم آ ملک آتا نیام اٹ تین پہ تینی پت و مخ تفی آ مبنی ہڑتوم آ کنڈآتا تعلقداری تا غٹ پہلو تیا گپ و تران کریر ۔ وزیراعظم جموں و کشمیر آ او آئی سی رابطہ پڑک نا باسک انا حیثیت تون اوار آذربائیجان نا قدر نا قابل کڑد انا ستاءِ کرے و نگور نوکاراباخ انا ویل آ پاکستان نا کنڈآن آذربائیجان نا مخ تفی نا درشانی ءِ کرے ۔ آذربائیجان نا صدر پدریسہ مخ تفی آ پاکستان نا منت واری ءِ ہرفے ۔ وزیراعظم آذربائیجان نا صدر ءِ مقبوضہ جموں و کشمیر اٹی انسانی حق انا سنگین و سجفوک خلا ف ورزی و 5اگست 2019ء نا بھارتی حکومت نا اسہ کنڈی و غیر کانود گام گیج آن معلومدار کرے ۔ ہراڑے غیر انسانی لاک ڈاءون اینو ہم برجاءِ ۔ کڑدہ غاک اسہ ایلو نا قومی باندات آتے کن مخ تفی نا درشانی ءِ کرے و غٹ بشخ آتے ٹی ہڑتوم آ کنڈآتا تعلقداری تے پین سوگو کننگ نا عزم ظاہر کرینو ۔ اوڑدہی ٹی دا ہیت آ امنا کننگاکہ بڑزکو کہول آ ہڑتوم آ کنڈآتا رابطہ و دورہ غاتے برجاتخنگک ۔ الہام علیوف وزیراعظم ءِ آذربائیجان نا دورہ نا سلہ ہم خلک ۔ اوڑدہی ٹی وزیر خارجہ مخدوم شاہ محمود قریشی و اقوام متحدہ ٹی جنیوا ٹی پاکستان نا آخبتی مندوب سفیر خلیل ہاشمی ئسک ہم ساڑی ئسر ۔
