ڈیووس ۔ 22جنوری (اے پی پی) وزیراعظم عمران خان پارینے کہ پاکستان اوغانستان اٹی امن کن امریکہ تون اواری اٹ کاریم کننگ ءِ، اوغانستان اٹی امن آن نیامی ایشیائی ریاست آتسکان رسینگ ممکن مریک، سعودی عرب و ایران نا نیام اٹ بے چیٹی تے کم کرفنگ کن سرگرم کڑد ادا کرینے، حکومت زرگزران ءِ سوگو کننگ و براہ راست درملکی زرکاری ٹی ودکی نا حکمت عملی آ عمل کننگ ءِ ، نن کرنسی ءِ سوگو کرین و کرنٹ اکاءونٹ نسخان اٹی 75 درسد کمتی کرین، درملکی زرکار آتے پرکشش آسراتی تننگ انگ ءِ ، پاکستان نا گل زمین چندی متکن آ تہذیب آتا مسکن ءِ، سیل و سوات ءِ مون آ درسا ملکی زرگزران ءِ شون تننگ مریک ، پاکستانی قوم دہشت گردی نا برخلاف جنگ اٹی 70 ہزار جان تا نذرانہ ءِ پیش کرے ۔ داخیال آتا درشانی ءِ او داڑے جہانی اقتصادی فورم نا وخت آ پاکستان سٹریٹجی ڈائیلاگ آن تران کرسا کرے ۔ وزیراعظم پارے کہ اوغان جنگ انا سوب ننا راج اٹ کلاشنکوف نا کلچر ودی مس، پاکستان اوغانستان اٹی امن کن امریکہ تون اواری اٹ کاریم کننگ ءِ ۔ اوغانستان اٹی امن آن پاکستان نا نیامئی ایشیا اسکان رسینگ ممکن مریک ۔ پاکستانی قوم دہشت گردی نا برخلاف جنگ اٹ 70 ہزار جان ندر کریر ۔ اوپارے کہ پاکستان اٹی امن نا غٹ آن زیات فائدہ سیل و سوات نا بشخ اٹی ءِ انتئے کہ پاکستان نا گل زمین چندی متکن آ تہذیب آتا مسکن ءِ و پاکستان اٹی چندی ہندن ءُ سیل و سواتی ہند ءُ ہرا دنیا نا خن تیان اودیم ءُ، نن سمجھنہ کہ سیل و سوات ءِ مون آ درسا ملکی زرگزران ءِ شونداری تننگ مریک ۔ اوپارے کہ پاکستان نا زیات تر آبادی ورناتیا تالان ءِ ۔ 60ء نا دہائی ٹی پاکستانی زرگزران غٹ آن ترند شون ہلوک آ زرگزران ئس وخت اس کہ 70 ء نا دہائی ٹی بھاز انگا ادارہ غاتے قومیائے آ ہِننگ آن زرکارآتا پت بدل مس ۔ اوپارے کہ پاکستان سعودی عرب و ایران نا نیام اٹ بے چیٹی تے کم کرفنگ کن تینا کڑد ءِ ادا کرینے، ننا کوشست ءِ کہ سعودی عرب و ایران تون تعلقداریک پین سوگو مریر ۔ اوپارے کہ اول نن تینا کرنسی ءِ سوگو کننگ و کرنٹ نسخان ءِ کم کننگ آ خڑچ کرین وکرنٹ اکاءونٹ نسخان اٹی 75 درسد نا کمتی مسنے ۔ اوپارے کہ کشاری و صنعتی بشخ انا شونداری کن گام گیج کننگ انگ ءِ و براہ راست درملکی زرکاری ٹی ودکی کن درملکی کمپنی تے پرکشش آسراتی تننگ انگ ءِ ۔ اوپارے کہ پاکستان اٹی پتل، خیسن و ایلو معدنیات آتا بھلوکوڑی اس ارے ہرافتے کاریم اٹ اتنگ کن پیشن زرکاری کننگ نا گرج ءِ ۔
