صدر مملکت ڈاکٹر عارف علوی نا مچ آ ملک انا غٹ ایوان صنعت و واپار نا صدر آتیان تران

اسلام آباد۔ 21جنوری (اے پی پی) صدر مملکت ڈاکٹر عارف علوی پارینے کہ ایف اے ٹی ایف سیاسی مسخت آتے کن بایدے کاریم اٹ بف، وزیراعظم ہم دا باندات آ امریکی صدر تون ہیت کرینے، کبینی و افراط زر انا مون ءِ توننگ کن خواری کننگ نا گرج ءِ۔ داخیال آتا درشانی ءِ او سے شنبے نادے آ مچ آ ملک انا غٹ ایوان صنعت وواپار نا صدر آتون ایوان صنعت و واپار اسلام آباد نا کنڈآن دود آن تران کرسا کرے۔ صدر مملکت پارے کہ کبینی نا مون ءِ توننگ آن بیدس شرح سود ءِ کم کننگ مفک۔ کبینی و افراط زر انا مونءِ توننگ کن خواری کننگ نا گرج ءِ۔ سٹیٹ بینک آف پاکستان نا حساب وکتاب نا رداٹ فروری ٹی کبینی و شرح سود اٹی کمتی نا گمان ءِ۔ اوپارے کہ ایف اے ٹی ایف سیاسی مسخت آتے کن بایدے کاریم اٹ بف۔ وزیراعظم ہم دا باندات آ امریکی صدر تون ہیت کرینے۔ صدر مملکت پارے کہ افرادی قوت نا بابت پاکستان دنیا نا شش میکو بھلا ملک ءِ۔ ننا چیلنج ءِ کہ کبینی ءِ کم کرسا خلقت نا ہلنگ نا وس ءِ ودفوئیءِ۔ وزیراعظم عمران خان کبینی ٹی کمتی کن ہر ہفتہ دیوان غا دیوان اڈتننگ نا ارادہ تخک۔ پاکستان اٹی افرادی قوت ورناتیا تالان ءِ۔ اوپارے کہ پاکستان اٹی بڑزکو خوانوک خلقت وارخواہی مفننگ آن پیشن نا ملک آ کارہ۔ پاکستان اٹی راجی کاریم تیٹی مخیر خواجہ غاتا بھاز بھلو کڑد اسے۔ چنکا ونیامئی درجہ نا صنعت آتے مون آ دننگ نا گرج ءِ۔ حکومت دا بابت گچین گام گیج کننگ ءِ۔ اوپارے کہ ننا غٹ انا مزل اسٹ ءِ و ہمو مزل ملک ءِ شونداری نا کنڈا دننگ نا ءِ۔ کاروباری تنظیمک کاروباری سرجز و زرکاری ءِ مون آ دننگ کن تینا کڑد ءِ ادا کیر۔ اوپارے کہ حکومت و پوریاگر تا نیام اٹ پدریسہ سلابت نا عمل بایدے برجاسلے انتئے کہ حکومت و کاروباری برادری ہڑتوم آ ک ملک اٹی کاروباری بشخ ءِ مون آ دننگ خوارہ۔ اوپارے کہ ملکی زرگزران اٹی شونداری آن کبینی و بے روزگاری کون آ ویل آتے ایسر کننگ اٹ کمک رسینگک۔ مستین نا حکومت آتا گام گیج آتا سوب ملک ءِ کرنٹ اکاؤنٹ نسخان و واپاری نسخان نا مون تروک ئس۔ ساڑی حکومت واپار اٹی آسانی ودی کننگ کن کیہی گام گیج کرینے۔ اوپارے کہ پیشن نا ملک رہینگوک پاکستانیک پاکستان اٹی زرکاری کننگ اٹ است خواہی تخرہ۔ حکومت اوفتے سازگار چاگڑد اس فراوان کننگ کن گچین گام گیج کننگ ءِ۔ اوپارے کہ مستین اٹی بجلی نا پیدوار نا بابت ڈٹ بندی ٹی پہو تہی کننگا ہراڑان بجلی نا تنکی ودی مس۔ گیگ بدل توانائی نا ڈٹ آتیان اڑزان بجلی نا دوئی کننگ ءِ پک کننگ مریک۔ اوپارے کہ کاروباری ڈل آتا پیشن نا ملک آتا دورہ غاتیان واپاری وارخواہی تیٹی ودکی مریک۔ پوریاگر برادری ءِ ای کامرس و مصنوعات آتا ویلیو ایڈ ڈ آ چکار کننگ نا گرج ءِ۔ صدر مملکت پارے کہ زالبول ءِ واپاری بشخ اٹی راہشونی و است بڈی نا کمک اٹ بریبر وارخواہی فراوان کننگ نا گرج ءِ۔ پوریا گر برادری تینا راجی زمواری تے پورو کرسا سازگار وارخواہی فراوان کیر۔ ڈاکٹر عارف علوی پارے کہ ملک اٹی سیل و سواتی بشخ اٹی بھلو وارخواہی اس ارے۔ کاروباری برادری ءِ دا بشخ اٹی زرکاری کننگ نا گرج ءِ۔ اوپارے کہ کشاری بشخ اٹی گچینی کن سیڈ ایکٹ زوت اتنگک۔ اوپارے کہ پوریا گر برادری نا ویل آتے ایسر کننگ کن ہروڑکمک فراوان کینہ و اوفتے کن ہروخت درگہ غاک یلہ ءُ۔ داوخت آ بنجا ایوان ہائے صنعت وواپار نا صدر میاں انجام نثار و اسلام آباد چیمبر آف کامرس اینڈ انڈسٹری نا صدر احمد حسن ئسک ہم تران کریر۔