وزیر داخلہ تون ہنگری نا سفیر نا اوڑدہی، سفارتی کمیونٹی ءِ ہروڑاٹ آسراتی فراوان کننگ نا پبی کوشست کننگ اُن، اعجاز شاہ

اسلام آباد۔ 21جنوری (اے پی پی) وزیر داخلہ اعجاز احمد شاہ پارینے کہ سفارتی کمیونٹی ءِ ہروڑ آسراتی فراوان کننگ نا پبی کوشست کننگ اُن۔ داخیال آتا درشانی ءِ او ہنگری نا سفیر سزابواستوان تون گپ وتران کرسا کرے ہرا سے شنبے نادے آ داڑے اوڑتون اوڑدہی کرے۔ وزارت داخلہ نا کنڈآن جاری بیان نارداٹ اوڑدہی ٹی تین پہ تینی باندات نا معاملہ غاتیا گپ وتران کننگا۔ ہنگری نا سفیر پاکستان اٹی سیکورٹی نا حالیت آتا است جمی نا درشانی ءِ کرے۔ اوپارے کہ جہانی کہول آ پاکستان نا پوزیشن اٹی پیدوار گچینی بسنے۔ وزیر داخلہ اعجاز احمد شاہ پارے کہ ہڑتوم آ کنڈآتا تعلقداری تا گچینی کن کاریم کننگ اٹ خوشی مریک، سیکورٹی حالیت آتا گچینی نا بابت است بڈی آ منت واری ءِ ہرفے۔ اوپارے کہ پورو کوشست ءِ کہ تینا سفارتی کمیونٹی ءِ ہروڑ آسراتی فراوان کین۔ ہنگری نا سفیر ویزہ و ایلو باندات آتیا وزارت داخلہ نا کمکاری نا منت واری ءِ ہرفسا پارے کہ او 8 سال آن داڑے خذمت سرانجام تننگ ءِ، پاکستان نا مہمان نوازی سفت نا قابل ءِ۔