ڈیووس۔ 21جنوری (اے پی پی) سوئٹزرلینڈ نا ہند ڈیووس اٹی بناکروک آ جہانی اقتصادی فورم (ورلڈ اکنامک فورم) نا سالانہ دیوان اٹی مچ آ دنیا غان 3ہزار راہشون نمائندہ بشخ ہلنگ ءُ۔ دا 50می وار ءِ کہ جہانی اقتصادی فورم نا سالانہ دیوان ڈیووس اٹ اڈ ہلنگ ءِ، داسال ڈیووس فورم نا تھیم ”اسہ آخبتی و پائیدار دنیا نا اسٹیک ہولڈرز“ ءِ۔ امریکہ نا صدر ڈونلڈ ٹرمپ تینا ڈل انا نمائندگی ءِ کننگ ءِ ہرافتے بنائی تران ہم کروئی ءِ۔ داوار چاگڑدی بدلی نا سرحال ایلو اہم سرحال آتون دیوان اٹی شرہ مریک۔ ڈیوس فورم اٹی سعودی عرب نا 55بندغ آتیا تالان بڑزکو کہول انا عہدیدار آتا ڈل بشخ ہلنگ ءِ۔ ڈل انا کماشی ءِ سعودی وزیر مملکت و کابینہ نا باسک ڈاکٹر ابراہیم بن عبدالعزیز ال آصف کننگ ءِ۔ سعودی ڈل اٹی وزیر توانائی شہزادہ عبدالعزیز بن سلمان،نائب وزیر دفاع شہزادہ خالد بن سلمان، سعودی آرامکو نا سی ای او امین ناصر اوار ءُ۔ ورنا چاگڑدی کمپنیز گریٹا تھنبرک ہم دیوان اٹی بشخ ہلیک۔ ایران دا وار ڈیووس فورم اٹی بشخ ہلپننگ ءِ۔ داوار ڈیووس 2020ء آ ہفت ذیلی تھیمز اٹی بشخنگانے ہرافتے ٹی جان جوڑ آخبت، ڈغار ءِ امر بچفوئی ءِ، گچین کاروبار، جیوپالیٹکس آن مون، جوانی کن ٹیکنالوجی، شفاف اقتصادیات و راج و کاریم ناآخبت اوارءِ۔ سوئٹزر لینڈ ریل کار انا کمک اٹ دنیا ٹی ہرجاگہ غان ڈیووس آ بروک آ بندغ آتا ریل انا فرسٹ کلاس نا ٹکٹ نا نرخ نیمہ کننگ نا پڑو ءِ کرینے۔
