واشنگٹن۔ 21جنوری (اے پی پی) جہانی مالیاتی فنڈ (آئی ایم ایف) اینخو و بروک آسال (2020-21) ء نا جہانی اقتصادی شرح نمو نا وڑاٹ کمتی کرسا بالترتیب 3.3و 3.4 درسد مننگ نا گمان ظاہر کرے، آئی ایم ایف نا پاننگ ءِ کہ چین امریکہ واپاری بے چیٹی جہانی زرگزران ءِ بھاز بے وڑزہمی کرے ہرادے بھارت نا ترندی اٹ تموک آ زرگزران پین خراب کنن گءِ، ولے آئی ایم ایف نا پاننگ ءِ کہ بیجنگ و واشنگٹن نا نیام اٹ واپاری مفاہمت برجاسلیس تو جہانی اقتصادی شرح نمو گچین مننگ کیک۔ داخیال آتا درشانی ءِ آئی ایم ایف نا سروک کرسٹالینا جارجیوا جہانی اقتصادی فورم نا وخت آ نیوز کانفرنس اٹی کرے۔ کرسٹالینا جارجیوا پارے کہ چین امریکہ واپاری بے چیٹی آن 2019ء ٹی جہانی اقتصادی شرح نمو بھاز بے وڑ زہمی مس ولے ساڑی آ واپاری معاہدہ غا عمل برجاسلیس تو جہانی زرگزران اٹی گچینی نا آثار مننگ کیک۔ اوپارے کہ بھارت اٹی بے پک سیاسی حالیت آتا سوب اونا اقتصادی شرح نمو ترندی اٹ زہمی مننگ ءِ ہرانا زہم آک جہانی زرگزران آہم تمنگ کیرہ۔ اونا پاننگ ئس کہ اینخو و بروک آ سال (2020-21) ء جہانی اقتصادی شرح نمو بالترتیب3.3و 3.4 درسد سلنگ نا گمان ءِ، داکان مست رپورٹ اٹی ہڑتوم آ سال تا اقتصادی شرح نمو 3.4 و 3.6 درسد سلنگ نا گمان ظاہر کننگاسس، دا کساس اٹی کمتی نا اہم سوب بھارتی زرگزران نا ساڑی آ بے پک حالیت آک ہم اریر۔
