اسلام آباد۔ 21 جنوری (اے پی پی) محکمہ موسمیات نا رداٹ بروک آ 24گھنٹہ ٹی بڑزکو خیبر پختونخوا،کشمیر، گلگت بلتستان اٹی جاگہ جاگہ غا وخت اس کہ بڑزکو پنجاب و اسلام آباد اٹی گڑاس ہند آتیا پِر و مش تیا برف انا گمان ءِ ولے سویلی پنجاب و بڑزکو سندھ انا ضلع غاتے ٹی نن نا وخت آ گوتلو مننگ نا گمان ءِ و ملک انا ایلو علاقہ غاتے ٹی موسم خشک و یخ سلک۔ رپورٹ نا رداٹ تدوک آ 24گھنٹہ ٹی خیبر پختونخوا، کشمیر، بلوچستان، گلگت بلتستان نا ضلع غاتے ٹی جاگہ جاگہ غا وخت اس کہ اسلام آباد، راولپنڈی، مری، اٹک، لاہور، ڈی جی خان، ملتان، اوکاڑہ و حافظ آباد اٹی گڑاس ہند آتیا پِر مس۔ مالم جبہ، کالام، دیر، سکردو، بگروٹ، پاراچنار و مری ٹی برف ہم ریکارڈ کننگا و ملک انا گیشتر علاقہ غاتے ٹی موسم یخ و جزوی وڑاٹ جمری ئس۔ داٹی مالم جبہ ٹی 12ملی میٹر، پاراچنار9، دیر9، بالاکوٹ 8، کاکول 5، سیدو شریف 4، میر کھانی، کالام، چیراٹ 2، بنوں، پشاور اسٹ، مظفر آباد 9، گڑھی دوپٹہ 7، کوئٹہ 5، قلات 4، مری 4، اٹک 2، بہاولپور، اسلام آباد اسٹ، بگروٹ 2، سکردو و گوپس اٹی اسہ ملی میٹر برف ریکارڈ کننگا۔ داکان بیدس مالم جبہ ٹی 6انچ، بگروٹ 3، مری، پاراچنار2، سکردو، اپردیر و کالام اٹی اسہ انچ برف ریکارڈ کننگانے۔ سے شنبے نادے آ ریکارڈ کروک آ کم آن کم درجہ حرارت نا رپورٹ نا رداٹ سکردو ٹی درجہ حرارت منفی 17، استور، گوپس منفی 12، بگروٹ، پاراچنار منفی 10، مالام جبہ منفی 5و کالام اٹی منفی 4 ڈگری سینٹی گریڈ ریکارڈ کننگانے۔
