ٹریفک کانود نا خلاف ورزی آ 17,98,291چالان
اسلام آباد۔ 20 جنوری (اے پی پی) نیشنل ہائی ویز اینڈ موٹروے پولیس (موٹروے زون) M-1(پشاور آن اسلام آباد) و M-2 (اسلام آباد آن لاہور) اسکان سال 2019ء نا کارکڑدگی رپورٹ ءِ جاری کرے۔ دوشنبے نادے آ موٹروے پولیس نا ترجمان نار داٹ موٹروے زون گچین کارکڑد نشان ترسا سال 2019ء ٹی جم وڑاٹ موٹروے آ سفر کروک آ 2لکھ 14ہزار آن زیات خلقت ءِ جتا وڑنا کمک فراوان کرے، موٹروے آ ٹریفک کانود نا پاسداری کپروک آ 17 لکھ 98 ہزار 291خلقت ءِ چالان کننگا ہرافتے ٹی 13وی آئی پی چالان ہم اوار ءُ۔ جم وڑاٹ بیرہ موٹروے زون اٹی 81 کروڑ 84لکھ 1ہزار 4سد ءُ 74 روپئی نا جرمانہ کننگا۔ داکان بیدس موٹروے زون اٹی 340کلومنشیات ہرافتے ٹی 28 کلو ہیرون، 36.54کلو چرس ہم دوئی کرسا تعلقدار کمامدارآتا حوالہ کننگا۔ 36دُزی مروک گاڈی دوئی کرسا اوفتے اوفتا مالک آتسکان سرکننگا، 27 گمشدہ یا اُراغان نروک آ چناتے لمہ و باوہ غاتون ملفنگا وخت اس کہ 2کروڑ 47 لکھ 59 ہزار 586روپئی جتا واقعہ غاتے ٹی ہرافتے ٹی موٹروے آن ملوک آ زر و ایلو ہموواقعہ غاک اوار ءُ ہرافتے ٹی خلقت تینا نہادی گڑاتے سروس ایریہ غاتے ٹی گیرام کریر مالک آتسکان سرکننگا۔ داکان بیدس 70 خیسن نا پیش نہاد زیور ہرافتا نہاد لکھ آتے ٹی ءِ ہراکہ موٹروے آ یا سروس ایریا ٹی خلقت گیرام کریسر اوفتے ہم اصل مالک آتسکان سرکننگا۔ موٹروے آن سمگلنگ ءِ بے سہب کرسا 967 موبائل فون 18 چاہ انا بوری، 18 بنڈل درملکی پچ، 1لکھ مالیت نا کیمرہ ہم دوئی کرسا تعلقدار ادارہ غاتا حوالہ کننگا۔ کم و ود 180 جتا وڑنا شکست آتے ٹی خلقت نا کمک ءِ کننگا۔ 800 نا خڑک خلقت ءِ وخت آ ہسپتال آ سرکننگا۔ چندی واردات آتے ٹی اوار 24دوبہ دار ءِ دزگیر کرسا کانودی چارہ جوئی کننگا۔ داکان بیدس روڈ سیفٹی ایجوکیشن نا مد اٹ 18 لکھ موٹروے ءِ کاریم اٹ اتوک آتے بریفنگ و روڈ سیفٹی پمفلٹس ہم بشخنگا۔ الس اٹ روڈ سیفٹی نا شعور تالان کننگ کن 35 آن زیات سیمینار، 26 واک و کم و ود 750 آن زیات اسکول، کالج، بس سٹینڈ، مدرسہ و ایلو جاگہ غاتیا روڈ سیفٹی آ لیکچر تننگا۔ داوخت آ ڈی ئی جی موٹروے اشفاق احمد است جمی نا درشانی ءِ کرسا پارے کہ دے پہ دے آ موٹروے آ ٹریفک ودنگ ءِ و چندی وڑنا چیلنج آک مون تروک ءُ ولے موٹروے پولیس ہروڑنا چیلنج آتون مون تننگ کن ہروخت تیار ءِ و نن تینا غٹ تر لائخی تے کاریم اٹ اتسا الس نا گچین وڑاٹ خذمت آتے برجاتخنہ۔ پین اونا پاننگ ئس کہ ساڑی آ دور اٹی روڈ سیفٹی تالان کننگ وخت انا اہم ءُ گرج اسے و دارداٹ میڈیا و سوشل میڈیا اہم ءُ کڑد اس ادا کننگ کیرہ۔ جم وڑاٹ گچین کارکڑد نشان تننگ آ ڈی آئی جی موٹرویز نا آفیسر آتا ستاءِ کرے و پین خواری و لگن اٹ الس نا خذمت ءِ کننگ آ زور شاغا۔
