اسلام آباد۔ 20 جنوری (اے پی پی) چین نا کنڈآن پاکستان اٹی جاری مالی سال اٹی براہ راست زرکاری ٹی کم و ود 100 درسد ودکی ریکارڈ کننگانے وخت اس کہ چین اتون واپاری نسخان اٹی ہم کمتی واقع مسنے۔ سٹیٹ بینک نا کنڈآن جاری حساب وکتاب نار داٹ جولائی آن ہلیس دسمبر اسکان نا وخت اٹی چین پاکستان اٹی 422.3 ملین ڈالر نا براہ راست زرکاری کرے۔ دا کچ تدوک آ مالی سال انا ہندا وخت انا مقابلہ ٹی 99.85 درسد زیات ءِ۔ تدوک آ مالی سال انا ہندا وخت اٹی چین پاکستان اٹی 211.3 ملین ڈالر نا براہ راست زرکاری کریسس۔ دسمبر 2019ء ٹی چین نا کنڈآن پاکستان اٹی براہ راست بیرونی زرکاری نا کچ 382.2ملین ڈالر ریکارڈ کننگا۔ حساب وکتاب نا رداٹ جولائی آن ہلیس نومبر اسکان نا وخت اٹی چین ءِ پاکستانی برآمد آتا کچ 727.48 ملین ڈالر ریکارڈ کننگا۔ تدوک آ مالی سال انا ہندا وخت اٹی چین ءِ پاکستانی برآمد آتا کچ 741.64ملین ڈالر ریکارڈ کننگاسس۔ ہنداوخت اٹی چین آن درآمد آتیا 4.025ارب ڈالر نا زرمبادلہ صرف مس۔ تدوک آ مالی سال انا ہنداوخت اٹی چین آن درآمد آتیا 4.25 ارب ڈالر نا زرمبادلہ صرف مسوسس۔ وزارت واپار نا کمامدار آتارداٹ چین اتون آجو واپار معاہدہ نا ایلو مرحلہ غا یکم جنوری آن بناکرینے ہراٹی سد آ پاکستانی گڑاتے چینی مارکیٹ اٹی ڈیوٹی نا ہِلنگ دوئی مسنے۔ اومیت ءِ مالی سال انا ایسر آ چین ءِ پاکستانی برآمد آتے ٹی پین ودکی مریک ہراٹی ملک انا واپاری نسخان اٹی نمان کمتی واقع مریک۔
