بلوچستان نیشنل پارٹی نا چار وونٹ آتے اٹ اگہ بے گواہ بندغ آک پدی بریر تو نسخان نا سودا اس اف ، بلوچستان نیشنل پارٹی نا بنجائی سیکرٹری حوالکاری باسک قومی اسمبلی آغا حسن بلوچ ایڈووکیٹ

کوءٹہ ۔ 17 جنوری (اے پی پی) بلوچستان نیشنل پارٹی نا بنجائی سیکرٹری حوالکاری باسک قومی اسمبلی آغا حسن بلوچ ایڈووکیٹ پارینے کہ پاکستان تحریک انصاف و اونا سیوتی جماعت آک بی این پی نا گوادر نا بابت قومی اسمبلی نا بروک آ دیوان اٹی مروک آ کانود جوڑ کننگ نا پورو مخ تفی ءِ کیرہ تانکہ گوادر آن غیر ہندی بندغ آتا شناختی کارڈ آتا جاری و گچین کاری فہرست آتے ٹی پن تا اندراج ءِ کرفنگ مف، بلوچستان نیشنل پارٹی نا چار وونٹ آتے اٹ اگہ بے گواہ بندغ آک پدی بریر تو نسخان نا سودا اس اف ۔ داخیال آتا درشانی ءِ او جمعہ نادے آ ’’اے پی پی‘‘ تون خصوصی گپ و تران کرسا کرے ۔ بی این پی نا باسک قومی اسمبلی آغا حسن بلوچ ایڈووکیٹ پارے کہ ننا پارٹی وخت اس ہم بنجائی حکومت آن وزارت یا جندی مراعات نا خواست کتنے بلکن ننا پارلیمنٹ اٹی مخ تفی شش ٹک آتیا عملدرآمد و بلوچستان نا شاری تا اجتماعی فائدہ غاتا دوئی کننگ و حق اتون مشروطءِ، و پنچ شنبے نادے آ بی این پی و پی ٹی آئی نا مذاکراتی ٹیم تا نیام اٹ پک مس وبنجائی حکومت ننے باوری کرفینے کہ بنجائی محکمہ غاتے ٹی بلوچستان نا شش درسد کوٹہ غا عملدرآمد بروک آ منہ ہفتہ ٹی پین سد آ بے گواہ بندغ آتا بازیابی اوغان باہوٹ آتا شرف اٹ واپسی تون اوار گوادر نا بابت قومی اسمبلی ٹی کانود جوڑ کننگ نا بابت پاکستان تحریک انصاف و اونا سیوتی جماعت آک ننے سپورٹ کیرہ، آغا حسن بلوچ پارے کہ کوءٹہ ٹی گیس پریشر نا کمتی و غیر اعلانیہ لوڈشیڈنگ نا بابت قومی اسمبلی ٹی توار بڑز کننگ تون بنجائی وزیر پٹرولیم عمر ایوب و ایم ڈی سوئی سدرن گیس کمپنی تون اوڑدہی کرسا اوفتے کوءٹہ نا شاری تا تکلیف آن معلومدار کرینن کہ منفی درجہ حرارت و پِر و برف انا موسم اٹ کوءٹہ شار اٹی گیس پریشر نا کمتی و لوڈشیڈنگ آن الس اٹی اشتعال خننگک ہراڑا اوفک باوری کرفینو کہ زوت کوءٹہ ٹی گیس پریشر نا ویل ءِ ایسر کننگک ۔ اسہ سوج اسے نا ورندی ٹی بلوچستان نیشنل پارٹی نا باسک قومی اسمبلی آغا حسن بلوچ ایڈووکیٹ پارے کہ نن بے گواہ بندغ آتا بازیابی تون اوار شش ٹک آتیا عملدرآمد و ایلو ویل آتا ایسر مننگ نا شڑت آ پارلیمنٹ اٹی آرمی ایکٹ نا بابت مروک آ کانود جوڑ کننگ اٹ حکومت نا مخ تفی ءِ کرینن انتئے کہ داوخت آ بے گواہ بندغ آتا خاہوت آک تکلیف اٹی ءُ و اگہ قومی اسمبلی ٹی بی این پی نا بیرہ چار باسک آتے اٹ گوادر اٹ کانود جوڑ کننگ تون اوار شش ٹک آتیا عملدرآمد و بلوچستان نا اجتماعی ویل آک ایسر مریرہ تو دا ننا نسخان نا سودا اس اف ۔