چیف الیکشن کمشنر و الیکشن کمیشن نا باسک آتا تعیناتی آ زوت امنائی سلاہ مریک
اسلام آباد ۔ 17 جنوری (اے پی پی) بنجائی وزیر پارلیمانی امور اعظم خان سواتی پارینے کہ چیف الیکشن کمشنر و الیکشن کمیشن نا باسک آتا تعیناتی آ زوت امنائی سلاہ مریک ۔ جمعہ نادے آ پارلیمانی کمیٹی نا دیوان آن پد میڈیا تون گپ و تران کرسا بنجائی وزیر پارے کہ حکومت و اپوزیشن نا کنڈآن پن تے زوت پارلیمانی کمیٹی ٹی شیئر کننگک ۔ اوپارے کہ حکومت و اپوزیشن پرعزم ءُ کہ دوشنبے نادے آ چیف الیکشن کمشنر و باسک آتا پن تیا امنا مریک ۔ چیف الیکشن کمشنر و باسک آتا تعیناتی آ دوشنبے نادے آ ہر حال اٹ فیصلہ کینہ ۔ بنجائی وزیر پارے کہ حکومت خواہک کہ اسہ صوبہ غا حکومت و ایلو صوبہ غا اپوزیشن نا سلاہ کروک پن تیا امنا مرے ۔ اعظم سواتی پارے کہ چیف الیکشن کمشنر حکومت و اپوزیشن نا امنائی اٹ اتنگ خواہک اگہ دا فارمولا غا امنا مفک تو سے شنبے نادے آ پین پوسکن ءُ فارمولہ اس پیش کینہ ۔ داوخت آ سینیٹر مشاہد اللہ خان پارے کہ الیکشن کمیشن ءِ آئینی تنکی آن بچفنگ حکومت و اپوزیشن ہڑتوم آتا زمواری ءِ ، اسلام آباد ہائی کورٹ ہم فیصلہ ٹی پارینے کہ الیکشن کمیشن نا باسک آتا تعیناتی حکومت و اپوزیشن نا اسیجا زمواری ءِ پارلیمانی کمیٹی نا دیوان آن پد مشاہداللہ خان پارے کہ داوخت اسکان حکومت نا کنڈآن چیف الیکشن کمشنر و باسک آتا پن تے پارلیمانی کمیٹی آ گدریفنگتنے، اومیت ءِ اینو حکومت نا کنڈآن پن تے گدریفنگک، اوکان پد آئینی وڑوڈول انا رداٹ اپوزیشن نا کنڈآن پن تے پارلیمانی کمیٹی آ گدریفنگک ۔ اوپارے کہ اومیت ءِ دوشنبے اسکان چیف الیکشن کمشنر و باسک آتا پن تیا امنا مریک ۔
