واشنگٹن ۔ 17 جنوری (اے پی پی) وزیر خارجہ مخدوم شاہ محمود قریشی پارینے کہ علاقائی و جہانی کہول آ دا بے پک حالیت آتے ٹی پاکستان و امریکہ نا نیام اٹ سوگو شریداری بے کچ المی ءِ ۔ پاکستان بیرہ ’’امن نا شریدار ءِ ۔ ’’ڈیہہ ٹی ہچ ءُ جنگ اسے نا بشخ مفک ۔ کشمیر نا تنکی ءِ ایسر کننگتو تو اونا نتیجہ سٹریٹجک لاءخی تخوک آ اِرا ملک آتا نیام اٹ فلیش پوائنٹ نا دروشم اٹ مون آ بننگ کیک ۔ امریکہ نا دورہ نا وخت آ سینٹر فار سٹریٹجک اینڈ انٹرنیشنل سٹڈیز اٹی پاک امریکہ تعلقداری تا بابت اڈ ہلوک آ دود آن تران کرسا وزیر خارجہ پارے کہ ای ہندن ءُ وخت اسے ٹی امریکہ نا دورہ غاٹی اُٹ ہراتم علاقائی و جہانی کہول آ ننے بھاز انگا چیلنج آک مون تروک ءُ ، ننا دے ٹک و دیکی ٹی اہم بدلی پیش بننگ ءِ ۔ بھارت نا کوزہ ٹی جموں و کشمیر اٹی انسانی حق و انسانی تنکیک پدریسہ برجاءُ، ہراڑے تدوک آ 5تُو آن 80 لکھ کشمیری غیر انسانی بندش و قیدوبند نا مصیبت آتون مون تننگ ءُ ۔ اوغان امن و مفاہمتی عمل اہم ءُ مرحلہ سے ٹی پترینگانے، ہنداوخت آ ایران و امریکہ نا نیام اٹ اناگت بے چیٹی علاقائی و جہانی امن و زرگزران کن خطرہ ودی کرینے ۔ علاقائی و جہانی کہول آ دا بے پکک حالیت آتے ٹی نن سمجھنہ کہ پاکستان و امریکہ نا نیام اٹ اسہ سوگو شریداری بے کچ اہم ءِ ۔ پاکستان نا خارجہ پالیسی نا گچین کاری نا اینو بنداوی وت و سرحال امن و شونداری ءِ مون آ دننگ ءِ ۔ وزیر خارجہ امریکہ ایران بے چیٹی تا بابت پارے کہ پاکستان بیرہ ’’امن اٹی حصہ دار ءِ‘‘ ۔ دا ڈیہہ ٹی ہچ ءُ جنگ اسے نا بشخ مفک ۔ پاکستان نا سعودی عرب و ایران تون خڑکی تعلقداری ءِ ۔ ننا سعودی عرب تون خاص ءُ تعلق اسے ۔ آزمائش نا ہر ساہت اٹی اسہ ایلو تون سلنگ ننا نیام اٹ اسہ سوگو ءُ روایت اس مسنے ۔ جنگ یا فوجی جھیڑہ ٹی سلامتی و معاشی خطرہ غاتا کڑمبی اٹ ادراک ءِ کرسا پاکستان اولیکو دے آن بے چیٹی تا چٹفنگ و غلط فہمی تے مر کننگ نا کوشست آتا مخ تف مسنے ۔ پاکستان، امریکہ و ایران نا کنڈآن بے چیٹی تیٹی کمتی نا اشارہ غاتا خیرمقدم ءِ کیک ۔ ساڑی آ نازرک حالیت آتے ٹی مچ آ دنیا نا اولی است خواہی امن کن اومیت ءِ ۔ اوغانستان نا بابت وزیر خارجہ پارے کہ ننا ملک و ڈیہہ ٹی ہمووخت اسکان حقی امن مننگ کپک ہراوخت اسکان اوغان ایلم و ایڑک اوغانستان نا داخلی و خارجی کہول آ امن آن ہمکنار مفسہ ۔ نن دا حقیقت آن داخاطران معلومدار اُن کہ ننا خلقت اوغان الس تون دا تکلیف انگا حالیت آتون مون تسنو ۔ یات سلے کہ اوغان ویل اتون مون تننگ ننے 11ستمبر 2001ء نا سہب آن آخا بلکن دا معاملہ دسمبر 1979ء ٹی اوغانستان اٹی سویت فوج انا اولیکو دستہ نا پترینگ انگ آن بناکریسس ۔ داویل ہمووخت آ بناکریسس ہراتم پنجا لکھ اوغان باہوٹ پاکستان آ بسوسر ۔ اوغانستان نا تہہ ٹی نزوری و جھیڑہ غان پاکستان نا خلقت زہمی مرسا بننگ ءُ ۔ داسہ داہیت ءِ 40 سال مسنے و داسہ دا چرجوئی برجاءِ ۔ ای دا ودکی ہم کننگ خواوہ کہ نائن الیون آن پد دہشت گردی نا برخلاف جنگ اٹی نن بے مٹ قربانی تسن و سیکورٹی فورس و لس شاری تتون اوار 70 ہزار پاکستانی شہید مسر ۔ ننا زرگزران ءِ دا سوب 150 ارب ڈالر نا براہ راست نسخان ہرفوئی تما ۔ دہشت گردی نا برخلاف جنگ انا بالواسطہ قیمت قومی زرگزران نا شدید زہمی مننگ نا حالیت اٹ ہرفے ہرانا ہچ ءُ کساس اس خلنگ مفک ۔ پاکستان و امریکہ ہڑتوم آ ک بھاز دتر تسنو و تینا نہادی وسیلہ غاتے خڑچ کرینو ۔ پاکستان بھلو وخت اسے آن دلیل ترسا بسنے کہ اوغانستان نا ہچ ءُ فوجی ایسری اس اف ہنداسوب ءِ کہ نن صدر ٹرمپ انا دا گام گیج نا ستاءِ کینہ ہرا او اوغانستان اٹی سیاسی تصفیہ نا مون آ ننگ کن ہرفینے ۔ اوغان امن عمل بشمول امریکہ طالبان مذاکرات اٹی کمکاری نا پاکستان نا مثبت کڑد انا جہانی کہول آ امنا مسنے ۔ اینو دا اومیت ودی مسنے کہ 2020اوغانستان اٹی امن نا سال مریک ۔ ننے یات تخوئی مریک کہ اوغانستان اٹی امن اسہ اجتماعی ءُ زمواری اسے ۔ پاکستان کڑد ادا کننگ ءِ وکرسا کیک ولے تن تنیا او کل ءِ کننگ کپک، غٹ ءِ اواری اٹ دا دے کروئی مریک ۔ جہانی برادری و اہم علاقائی گوازی گر تے تینا کڑد ءِ ادا کروئی مریک ۔ داڑتون اوار اوار ننے ’’شرپسند‘‘ آتیان ہم ہوشیا ر مروئی مریک ۔ است ہسونی نا ہیت دادے کہ ڈیہہ ٹی غٹ دُن ءُ ملک افس ہرا اوغانستان اٹی امن نا ہُننگ نا حق اٹی مریر ۔ نن اوغانستان اٹی امن کن مخلصانہ کاریم کننگ اُن وے ننے ’’تنازعہ غان پد‘‘ انا مرحلہ غاہم تینا پبی چکار ءِ تخنگ نا گرج ءِ ۔ مقبوضہ کشمیر نا بابت وزیر خارجہ پارے کہ وزیراعظم عمران خان مدام’’پرامن ہمسائیگی‘‘ نا سوچ انا درشانی ءِ کرینے ۔ جولائی 2018ء ٹی گچین کاری تیٹی سرسہبی آن پد او بھارت تون وعدہ کرے کہ ’’اگہ نی امن کن اسہ گام اس ہرفیسہ تو پاکستان اِرا گام ہرفک‘‘ ۔ اوتینا وعدہ ءِ پورو کرینے و تاریخی رداٹ ہڑتوم آ ملک آتا نیام اٹ تلخی آ مبنی تعلقداری تیٹی گچینی کن چندی کوشست آتے کرینے ۔ بدبختی اٹ بھارت ہر مثبت گام انا ورندی ءِ منفی رویہ اٹ تسنے، پاکستان نا تحمل و وزیراعظم عمران خان نا مدبرانہ رویہ نا سوب جنگ انا دہانہ غان ہڑتوم آملک آک پدی بسر ۔ وزیراعظم دزگیر بھارتی پائلٹ ءِ پدی تس ۔ بدبختی اٹ بی جے پی نا حکومت امن کن ننا است خواہی و عزم ءِ ننا نزوری نا علامت سمجھا ۔ ننے اومیت ئس کہ بھارتی گچین کاری تیان پد بی جے پی نا حکومت بلوغت نا درشانی ءِ کیک ، اونا برعکس ’آر ایس ایس‘ سوچ انا اثراٹی ’بی جے پی‘ حکومت بھارت ءِ ’’ ہندوراشٹرا‘‘ ٹی بدل کننگ نا ڈٹ آ کاریم نا بناءِ کرے ۔ ’’ہندتوا‘‘ و ’’اکھنڈبھارت‘‘ نا پرچار و اوڑا سلنگ نا تباہ کن نتیجہ غاک نئے بیرہ بھارت بلکن مچ آ دنیا ٹی مون آ بننگ ءُ ۔
