واشنگٹن ۔ 17 جنوری (اے پی پی) وزیر خارجہ شاہ محمود قریشی پارینے کہ پاکستان و امریکہ نا نیام اٹ دفاعی و سیکورٹی کمکاری ، ننا ہڑتوم آ کنڈآتا تعلقداری تا اہم ءُ کڑی اسے، داہیت ءِ او امریکی نائب وزیر دفاع جان روڈ تون گپ و تران کرسا پارے ہرا واشنگٹن اٹی وزیر خارجہ تون اوڑدہی کرے ۔ اوڑدہی ٹی پاک امریکہ ، دفاعی تعلقداری و ڈیہہ ٹی امن وا یمنی نا جم حالیت آتیا گپ و تران کننگا ۔ امریکی نائب وزیر دفاع وزیر خارجہ ءِ پاک امریکہ دفاعی کمکاری نا ساڑی آ وڑتیان معلومدار کرے وخت اس کہ وزیر خارجہ شاہ محمود قریشی اودے پاکستان نا کنڈآن سویلی ایشیا ٹی عمل کن کروک آ چندی کوشست آتیان معلومدار کرے ۔ وزیر خارجہ پارے کہ پاکستان و امریکہ نا نیام اٹ دفاعی و سیکورٹی کمکاری، ننا ہڑتوم آ کنڈآتا کمکاری نا اہم ءُ کڑی اسے، شاہ محمود قریشی پارے کہ امریکہ نا کنڈآن ’’جہانی عسکری تعلیم و تربیت پروگرام نا بحالی نا فیصلہ ننا خڑک آ بھاز اہمیت تخک دا فیصلہ غان ہڑتوم آ ملک آتا نیام اٹ عسکری کمکاری نا پوسکن ءُ کسر ملنگک ۔ اوپارے کہ دے ٹکی نیامی ٹی بے چیٹی مچ آ ڈیہہ کن گڑتی تا سوب مننگ کیک ہنداخاطران پاکستان بے چیٹی تے کم کننگ و امن نا کوشست آتے کاریم اٹ اتنگ نا فیصلہ کرے ۔ وزیر خارجہ امریکی نائب وزیر دفاع ءِ تینا ساڑی آ دورہ ایران و سعودی عرب نا سرجم آتے پارسا ایران امریکہ بے چیٹی تیٹی کمتی اتنگ و ڈیہہ ٹی امن کن پاکستان نا کنڈآن متحرک و گچین کڑد ادا کننگ نا عزم انا درشانی ءِ کرے ۔
