اسلام آباد ۔ 16 جنوری (اے پی پی) مزن وزیر عمران خان ءِ سروکی ءَ مقبوضہ کشمیر ءِ جاور ھال آنی چار ءُُ تپاسی گرگ ءِ رد ءَ مزن تک ءِ دیوان ءِ پنچ شمبے ءِ روچ ءَ برجم دارگ بوت ۔ دیوان ءَ آرمی چیف جنرل قمر جاوید باجوہ، مزن وزیر ءِ ھاسیں کمکار ڈاکٹر معید یوسف، ڈائریکٹر جنرل آئی ایس آئی لیفٹننٹ جنرل فیض حمید ، سیکرٹری خارجہ سہیل محمود ایندگر اُردی ءُُ اُلسی کلانہ ایں کارندہ آں بھر زوری کت ۔ دیوان ءَ مقبوضہ کشمیر ءِ جاور ھال ءِ توا میں بھر آنی چار ءُُ تپاسی گپت ۔ دیوان ءَ شریکیں 165روچ آں چہ 80لکھ کشمیری آنی لگت مالی لاک ڈاءون، 9لکھ بھارتی فورسز آنی نیمگ ءَ بنی آدمی ھک آنی لگت مالی، ءُُ بی جے پی ءِ فاشٹ حکومت ءِ نیمگ ءَ ایمنی ءُُ سلامتی ءِ استیں جیڈھ ءُُ بیم ءُُ کشاں چیل ءَ را ایراد گپت ۔ دیوان ءَ اے گپ ءِ نشان دیگ بوت کہ آر ایس ایس ءَ چہ آماچیں بی جے پی حکومت ءِ ، ہندو تواِ زہنیت ، ھمے مسلمان دژمنی ءُُ کشمیری آنی ھلاپ کنگ گنوکی ءِ بنیات ءَ برجا انت، دمگی ایمنی ءُُ برجائی ءِ واستہ بیم ناکیں جاور ھال آنی زمہ وار انت ۔ مزن وزیر ءَ کشمیری الس ءِ گوما یکوئی ءُُ آوانی سیاسی، سفارتی ءُُ اخلاقی کمک ءَ را جاڑی دارگ ءِ جزم ءِ درشان کت ۔
