نیویارک ۔ 16جنوری(اے پی پی) وزیر خارجہ شاہ محمود قریشی پارینے کہ اوغان طالبان متشدد رویہ غاتے ٹی کمتی اتنگ آ آمادگی نا درشانی ءِ کرینو ہرا امن معاہدہ نا کنڈاگچین ءُ پیش رفت اسے، پاکستان امریکہ و طالبان تا نیام اٹ مذاکرات آ پیش رفت نا خواہندار ءِ، پاکستان، اوغانستان تون اوار ڈیہہ ءِ امن و سوگوی نا گرج ءِ ۔ پنچ شنبے نادے آ اوغان امن عمل آ مروک آ پیش رفت نا بابت اسہ ویڈیو بیان اسے ٹی وزیر خارجہ پارے کہ منہ وخت آن امریکہ و طالبان تا نیام اٹ مذاکرات برجائس و نن خواہسونہ کہ مذاکرات آپیش رفت اس مرے ، نن سمجھنہ کہ پاکستان اوغانستان و دا ڈیہہ ءِ امن و سوگوی نا گرج ءِ ۔ وزیر خارجہ پارے کہ اینو دا چرجوئی ٹی اسہ گچین ءُ پیش رفت اس مون آ بسنے و پاکستان متشدد رویہ غاتے ٹی کمتی نا ہرا خواست ءِ کریسس طالبانک داڑا آمادگی نا درشانی ءِ کرینو ۔ اوپارے کہ داڑان امن معاہدہ نا کنڈاپیش رفت مسنے، خوشی دا ہیت انا ءِ کہ پاکستان ہرا مصالحانہ زموار یءِ ہرفیسس اودے باعافیت پورو کرینے، ننا است خواہی ءِ کہ ڈیہہ ٹی امن مرے و دانا فائدہ اوغانستان ءِ ہم مرے و پاکستان نا الس ءِ ہم مرے ۔
