نیویارک ۔ 16جنوری (اے پی پی) وزیر خارجہ مخدوم شاہ محمود قریشی نیو یارک اٹی اقوام متحدہ نا جنرل اسمبلی نا صدر تجانی محمد باندے تون اوڑدہی کرے ۔ اقوام متحدہ ٹی پاکستان نا آخبتی مندوب منیر اکرم ہم دا اوڑدہی ٹی ساڑی ئس، اوڑدہی ٹی ہڑتوم آ راہشون تا نیام اٹ اہم علاقائی و جہانی سرحال آتیا سیر اٹ گپ و تران مس ۔ اقوام متحدہ نا کڑد انا ستاءِ کرسا وزیر خارجہ مخدوم شاہ محمود قریشی پارے کہ موسمیاتی بدلی ، نیزگاری تون اوار چندی چیلنج آتون مون تننگ و سوگو شونداری نا شریدار ہدف آتا دوئی کننگ کن پبی گام گیج چست کننگ نا بابت اقوام متحدہ نا کڑد ہمیشہ اہم و المی مسنے ۔ وزیر خارجہ مخدوم شاہ محمود قریشی صدر اقوام متحدہ جنرل اسمبلی ءِ الس نا راجی آسراتی کن وزیراعظم عمران خان نا کنڈآن بناکروک آ خصوصی ڈٹ، احساس پروگرام و جان جوڑی آسراتی پروگرام نا خدوخال آن معلومدار کرے ، وزیر خارجہ مخدوم شاہ محمود قریشی صدر جنرل اسمبلی تون اوڑدہی ٹی، کرپشن نا چٹفنگ و پلوک آ قومی دولت ءِ پدی اتنگ کن جہانی کہول آ کمکاری ءِ مون آ دننگ نا گرج آ زور شاغا ۔ وزیر خارجہ تجانی محمد باندے ءِ پارے کہ اینو مقبوضہ جموں و کشمیر اٹی کرفیو ءِ 165 دے تدینگانے، کودک کشمیری تے ظلم و بربریت نا شست کننگ انگ ءِ ، مقبوضہ جموں و کشمیر نا 80 لکھ کشمیری تے بھارتی ظلم و جور آن نجات ترفنگ کن اقوام متحدہ جنرل اسمبلی و سیکورٹی کونسل کون آ جہانی ادارہ غاتے تینا گچین کڑد ءِ ادا کروئی مریک ۔ مخدوم شاہ محمود قریشی وزیر خارجہ صدر اقوام متحدہ جنرل اسمبلی ءِ دے ٹکی نیامی ٹی بے چیٹی تے کم کننگ کن پاکستان نا کنڈآن کروک آ کوشست آتیان ہم معلومدار کرے ۔
