نیویارک ۔ 16جنوری (اے پی پی) وزیر خارجہ شاہ محمود قریشی دا عزم انا درشانی ءِ کرے کہ پاکستان ڈیہہ ٹی ہچ ءُ جنگ اسے نا شریدار مفک، پاکستان امن کن تینا متحرک و گچین کڑد ءِ ادا کننگ کن پرعزم ءِ ۔ داہیت ءِ او نیویارک اٹی اقوام متحدہ نا سیکرٹری جنرل انتونیو گوتھریس تون اوڑدہی ٹی پارے ۔ اقوام متحدہ ٹی پاکستان نا آخبتی مندوب منیر اکرم ہم دا اوڑدہی ٹی ساڑی ئس ۔ ہیت وگپ اٹی دے ٹکی نیامی نا حالیت، بھارت نا کنڈآن مقبوضہ جموں و کشمیر اٹی برجا انسانی حق انا خلاف ورزی تے تون اوار ڈیہہ ٹی امن و ایمنی نا جم حالیت آتیا گپ و تران کننگا ۔ وزیر خارجہ سیکرٹری جنرل اقوام متحدہ ءِ دے ٹکی نیامی ٹی بے چیٹی تے کم کرفنگ کن پاکستان نا سفارتی کوشست آتیان معلومدار کرے ۔ وزیر خارجہ سیکرٹری جنرل اقوام متحدہ ءِ وزیراعظم عمران خان نا خصوصی پارت آ کروک آ، تینا ساڑی آ دورہ ایران و سعودی عرب نا سرجم آتیان معلومدار کرے ۔ شاہ محمود قریشی پارے کہ پاکستان دا سمجھک کہ دا ڈیہہ پوسکن ءُ جنگ اسے سگنگ کپک ۔ گرج داہیت انا ءِ کہ غٹ کڑدہ غاتے بے چیٹی تیٹی کمتی اتنگ و باندات آتے پرامن وڑاٹ ایسر کننگ کن، سیاسی و سفارتی ذریعہ غاتے کاریم اٹ اتنگ آ آمادہ کننگے ۔ وزیر خارجہ پارے کہ نن سمجھنہ کہ دا چک و تاڑ نا کیفیت نا مون ءِ توننگ کن ’’اقوام متحدہ‘‘ تینا چارٹرنا رواٹ اہم کڑد ادا کننگ کیک ۔ وزیر خارجہ دا عزم انا درشانی ءِ کرے کہ پاکستان ، ڈیہہ ٹی ہچ ءُ جنگ اسے نا شریدار مفک ولے امن کن پاکستان تینا متحرک و گچین کڑد ءِ ادا کننگ کن پرعزم ءِ ۔ یو این سیکرٹری جنرل انتونیوگوتھریس امن کن پاکستان نا مثبت کڑدانا ستاءِ کرسا غٹ کڑدہ غاتے بے چیٹی تیٹی کمتی اتنگ و باندات آتے افہام و تفہیم اٹ ایسر کننگ نا گرج آ زور شاغا ۔ وزیرخارجہ پارے کہ بھارت نا کنڈآن مقبوضہ جموں و کشمیر اٹی برجا انسانی حق انا سنگین خلاف ورزیک بے کچ تشویشناک ءُ ۔ مقبوضہ جموں و کشمیر نا 80 لکھ کودک کشمیری، 5 اگست آن پدریسہ، لامتناعی کرفیو تون مون تننگ ءُ ۔ شاہ محمود قریشی پارے کہ میڈیا غا پورو پابندی و کمیونیکیشن بلیک آءوٹ نا کمک اٹ راستکی تے دنیا نا خن تیان اودیم تخنگ نا کوشست کننگ انگ ءِ ۔ گرج داہیت انا ءِ کہ اقوام متحدہ و جہانی برادری کودک کشمیری تے بھارتی ظلم و جور آن نجات ترفنگ کن بھرمی گام ہرفے ۔ وزیر خارجہ ، 5اگست نا بھارتی گام آن پد پاکستان و چین نا خصوصی درخواست آ، پنچ تُو انا وخت اٹی ، سلامتی کونسل نامسہ دیوان تا اڈتننگ ءِ ستاکڑزوک گوندسا، سیکرٹری جنرل انتونیو گوتھریس نا منت واری ءِ ہرفے ۔ اقوام متحدہ نا سیکرٹری جنرل انتونیوگوتھریس انسانی حق انا خلاف ورزی تیا گڑتی نا درشانی ءِ کرسا کڑدہ غاتے بے چیٹی تیان بچنگ و غٹ ایسر نا چاری باندات آتے مذاکرات نا کمک اٹ ایسر کننگ نا گرج آ زور شاغا ۔
