اسلام آباد ۔ 16 جنوری (اے پی پی) موسمیاتی بدلی نا وزیر مملکت زرتاج گل پارینے کہ برف آن مروک آ بھس کاری تون مون تننگ کن حکومت ، ڈیزاسٹرمینجمنٹ اتھارٹی ءِ سوگو کننگ کن پبی گام گیج کننگ ءِ ۔ نجی ٹی وی چینل تون گپ و تران کرسا او پارے کہ ملک اٹی ساڑی آ پِر و برف آتیان زہمی خلقت ءِ پیش بروک آ مشکل آتے مر کننگ کن ہروڑنا گام گیج کننگک ۔ اوپارے کہ موسمیاتی بدلی تا سوب آن بروک آ چیلنج آتا مقابلہ ءِ کننگ کن گچین ڈیزاسٹر مینجمنٹ المی ءِ ۔ زرتاج گل پارے کہ حکومت تعلقدار محکمہ غاتے پارت کرینے کہ او موسم نا شدید حالیت آتا سوب ہروڑنا ہلہلہ ئی حالیت آتا مقابلہءِ کننگ کن چوکس مریر ۔ اوپارے کہ جہانی آب وہوا ٹی ڈرامائی وڑاٹ بدلی بننگ ءِ وپاکستان اسہ بے کچ بے رکھوک ملک آتیان اسٹ ءِ ۔ او است ہسونی نا درشانی ءِ کرے کہ بدبختی اٹ ، مسکوہی حکومت آک موسمیاتی بدلی تیا چکار کتوس و آفت آتون مون تننگ کن تعلقدار ادارہ غاتے پوسکن ءُ ٹیکنالوجی فراوان کتوس ۔ زرتاج گل چندی علاقہ غاتے ٹی موسلا دھار پِر و برف اناسوب آن نہادی جان تا زیان آ ڈکھ و است ہسونی نا درشانی ءِ کرسا پارے کہ ترند انگا یخ و برف اٹی زہمی خلقتءِ بچفنگ حکومت نا اولیت ءِ ۔ اوپارے کہ وزیراعظم عمران خان مہالو آن تعلقدار محکمہ غاتے ہلہلہ ئی بنداو تیا زہمی خاہوت آتے کمک فراوان کننگ نا پرمان جاری کرینے ۔
