اسلام آباد ۔ 16جنوری (اے پی پی) وزیراعظم نا خصوصی کمکار قومی جان جوڑی ڈاکٹر ظفر اللہ مرز اپارینے کہ وزیراعظم ادارہ غاتے ٹی اصلاحات، شونداری و سوگوی خواہک ، ڈریپ خلقت ءِ دوانا منفی زہم تیان رکھ تخوک آ ادارہ ءِ، ننے تینا ادارہ غاتے سوگو و شفاف جوڑ کروئی ءِ ۔ داخیال آتا درشانیءِ او پنچ شنبے نادے آ ڈریپ ماڑی نا بنداو ءِ تخنگ نا دود آن تران کرسا کرے ۔ خصوصی کمکار پارے کہ اینو نن ڈریپ انا ماڑی نا بنداو ءِ تخنگ والا اُن ۔ اوپارے کہ ای سی سی کمیٹی ٹی بٹنگ انگا، ولدا اولیکو وار ڈریپ ماڑی نا منظوری ءِ تننگاسس ۔ ننے کیہی مشکل آک پیش بسنو، نن تون ڈریپ نا تینا ماڑی الوکہ ہراڑان نسخان مریک کہ بھاز انگا پروگرام تے چلیفنگ مفک ۔ اوپارے کہ پاکستان اٹی ڈرگ ریگولیٹری ادارہ جوڑ مرے ہراڑا الس و دوا جوڑ کروک آ کمپنی تا پت مرے ، دوائی تا نہاد و مضر اثرآتیان بچفنگ نا بابت ہم دوا ساز کمپنی تیکن گچین فعال ریگولیٹری اتھارٹی اسے نا جوڑ کننگ المیءِ ۔ اوپارے کہ ڈریپ بروک آ سال تیٹی اسہ ادارہ سے نا دروشم ءِ اختیار کیک ہراڑے خلقت برسا تربیت دوئی کیرہ، نن تینا ادارہ غاتے سوگو و شفاف جوڑ کروئی ءِ، ادارہ غاتے ٹی کرپشن نا زیروٹالرنس ءِ ۔ ڈاکٹر ظفر مرزا پارے کہ متعین وخت اٹی دوائی تا نہاد، لیسن جاری کننگ، غٹ کمپیوٹرائزڈ مریرہ ۔ پنجا ملین دستاویز آتے ڈریپ اٹی ڈیجیٹلائز کرینن ۔ اوپارے کہ جون 2021 ء اسکان دا ماڑی سلوک مریک ۔ فارمیسی کونسل آف پاکستان ہم کرایہ نا ماڑی ٹی ءِ ، ڈریپ انا بلڈنگ اٹی فارمیسی کونسل آف پاکستان ءِ ہم گدریفنہ ۔
