اسلام آباد۔ 15جنوری (اے پی پی) صدر مملکت ڈاکٹر عارف علوی شاری تیا زور شاغا نے کہ او سرکاری ادارہ غاتا بابت تینا غاوتا زوت ازالہ ئِ کننگ کن بنجائی محتسب نا آن لائن پورٹل آن فائدہ ہرفر۔ بنجائی محتسبین نا ایسر کروک آ کیس آتا بارواٹی تینا ویڈیو کلہو آ السی ردعمل نا ورندی ٹی صدر مملکت بنجائی محتسب نا آن لائن پورٹل نا لنک ئِ تینا ٹویٹر آ شیئر کرے۔ صدر مملکت تینا ویڈیو کلہو اٹی پاریسس کہ سرکاری محکمہ غاتا برخلاف السی غاوتا دمدستی ازالہ ئِ کننگ کن بنجائی محتسب نا ادارہ پورو فعال ئِ و ہروڑنا غاو آ 60 دے انا تہہ ٹی فیصلہ کننگ نا پابند ئِ۔ صدر مملکت تینا ٹویٹر کلہو اٹی پارے کہ شاری تا کنڈآن بنجائی محتسب تون غاوتا اندراج نا وڑوڈول نا بارواٹی سوج ہریفینے۔ اوفک سرجم معلومداری کن بنجائی محتسب نا آن لائن پورٹل http://mohtasib.gov.pkتون رجوع کیر۔ دا لنک انا کمک اٹ شاری تے محتسب نا11 دفتر آتون رابطہ کننگ کن راہشونی ملک۔ بنجائی محتسب نا دنگ اٹ غٹ بنجائی وزارت، بنجائی یونیورسٹی ، غٹ بینک و انشورنس کمپنیک بریرہ۔ صدر مملکت پارے کہ شاریک اسہ سادہ ئُ پنہ سے آ تینا غاوتے داخل کرفنگ کیرہ و داڑکن نئے اوفتے خڑچہ و نئے وکیل نا گرج ئِ۔ اوپارے کہ محتسبین نا فیصلہ غاتیا اپیل آک صدر آ بریرہ و ای باوری کرفیوہ کہ صدارتی دفتر اٹی بروک آ ہر اپیل آ 24گھنٹہ نا تہہ ٹی فیصلہ کننگک۔
SMH
